Azərbaycan, Bakı, 04 may / Trend , müxbir N.İsmayılova /
"Mayın 12-də Bakıda Azərbaycan-Rusiya işgüzar palatasının geniş iclası keçiriləcək", - bazar ertəsi Rusiyanın Azərbaycandakı ticarət nümayəndəsi Yuri Şedrin deyib.
"İclasda ikitərəfli əlaqələrin inkişaf imkanları və perspektivləri müzakirə olunacaq, həmçinin Azərbaycan-Rusiya palatasının Rusiyanın Azərbaycana yeni təyin olunmuş səfiri Vladimir Doroxinlə tanışlığı baş tutacaq", - Şedrin deyib.
Hazırda Azərbaycan bazarında 550-dən çox rus şirkəti fəaliyyət göstərir. Onlardan 167-si 100 faiz rus kapitallı, 237-si birgə müəssisədir. Rusiyada 54 azəri-rus BM, 700-dən çox azərbaycanlıların başçılıq etdiyi şirkət və Azərbaycandan gələn üç mindən çox fərdi sahibkar fəaliyyət göstərir.
Rusiya hökuməti Azərbaycan-Rusiya ticarət dövriyyəsinin 2008-ci ildə qeydə alınmış müsbət dinamikasını qorumağa çalışır. Ötən il ticarət dövriyyəsi 42,5 faiz artaraq 2,402 milyard dollar təşkil edib.
2009-cu ilin real proqnozu Azərbaycanla 2008-ci ildə qeydə alınmış ticarət dövriyyəsi səviyyəsinin qorunmasıdır. Nikbin proqnoz ticarət dövriyyəsinin 2,5 milyard dollara qədər qaldırılmasıdır.
Rusiya tərəfinin məlumatına görə, bu ölkənin Azərbaycana ixracı ötən il 1991,1 milyon dollar (2008-ci il ərzindəki artım 42,6 faiz), idxal isə 401,4 milyon dollar təşkil edib (+25,4 faiz).
Məqalə müəllifi ilə əlaqə ünvanı: [email protected]