Azərbaycan, Bakı, 18 may / Trend , müxbir Ü.İsmayılova /
"Dünya maliyyə böhranı şəraitində Rusiya sığorta bazarının ciddi problemləri 2010-cu ildən başlayacaq", - Rusiyanın "Vesti" telekanalı ilə canlı yayımda "Malakut" sığorta brokeri şirkətinin direktorlar şurasının sədri Andrey Dolqopolov deyib.
"Məncə, sığorta bazarının problemləri ümumi iqtisadiyyatın böhrandan çıxışından sonra başlayacaq", - Dolqopolov bildirib.
Onun sözlərinə görə, bu durum sığortanın zaman daxilində bir qədər ertələnməsi səbəbindən baş verir. "Bütün sığortaçılar bu dövr üçün dözümvə maliyyə vəsaitləri ehtiyatı yığmalıdır", - Dolqopolov hesab edir.
"Malakut"un hazırlığı barədə danışarkən Dolqopolov bildirib ki, şirkət ötən illər ərzində yığdığı ehtiyatlar hesabına öz işini normal rejimdə davam etdirir və o, ümid edir ki, yaxın zamanlarda şirkətin fəaliyyətində eniş yaşanmayacaq. Ancaq eyni zamanda inkişaf da gözlənilmir.
"Bizim şirkət bu dövrə hazırdır", - Dolqopolov deyib.
"Malakut" sığorta brokeri Rusiyanın ən böyük sığorta şirkətlərindən biridir. Şirkət sığorta və müxtəlif risklərin yenidən sığortalanması sahələrində korporativ müştərilərə xidmət və məsləhətlər verilməsi üzərində ixtisaslaşıb. Ukrayna və Vyetnamda nümayəndəliklər, Qazaxıstanda "SP-MALAKUT" və Azərbaycanda "MALAKUT Sigorta" broker şirkətləri vardır.
"Malakut" sığorta brokeri Azərbaycan bazarına 2006-cı ildə daxil olub, 2009-cu il aprelin 29-dan isə Azərbaycanın xarici sığortaçılar, yenidən sığorta və sığorta brokerləri reyestrinə daxil edilib.
Məqalə müəllifi ilə əlaqə ünvanı: [email protected]
