Azərbaycan, Bakı, 19 may / Trend , müxbir Ü.İsmayılova /
Bakıda iqtisadi əməkdaşlıq üzrə Azərbaycan-Kuba hökumətlərarası komissiyanın ikinci iclasının yekunlarına əsasən protokolun imzalanması mərasimi keçirilib.
"İclasın gedişində yaxın gələcəkdə qarşılıqlı əməkdaşlıq məsələləri, o cümlədən qəbul edilmək üçün müvafiq dövlət orqanlarına göndəriləcək işlər müzakirə olunub", - komissiyanın Azərbaycan hissəsinin həmsədri, mədəniyyət və turizm naziri Əbülfəz Qarayev deyib.
Onun sözlərinə görə, dünyadakı proseslər nəzərə alınaraq protokola düzəlişlər edilib və ona əməkdaşlığın yeni istiqamətləri əlavə edilib. Tərəflər əsasən kənd təsərrüfatı, ərzaq məhsullarının istehsalı, veterinar fəaliyyət, səhiyyə və karantin işləri sahələrində əməkdaşlıq haqqında razılığa gəliblər.
Azərbaycan və Kuba, həmçinin mədəniyyət və turizm, informasiya mübadiləsi üzrə statistika, informasiya texnologiyaları və rabitə sahələrində əməkdaşlıq etmək niyyətindədirlər.
"Azərbaycan və Kuba arasında ticarət dövriyyəsinin kiçik olmasına baxmayaraq, tərəflər onun artırılması üçün potensiala malikdir", - nazir deyib.
Enerji sahəsində əməkdaşlıq protokolda xüsusi bəndlə ayrılıb və azərbaycanlı neftçilərin Kuba neft yataqlarındakı kəşfiyyat işləri zamanı iştirakını nəzərdə tutur.
Qarayevin sözlərinə görə, tərəflər həm də peşəkar idmançıların hazırlığı sahəsində də əməkdaşlıq etmək istəyirlər.
"Tərəflər hökumətlərarası komissiyanın üçüncü iclasının 2010-cu ilin yanvar-fevral aylarında Kubada keçirmək qərarına gəliblər", - Kubanın xarici ticarət və xarici sərmayələr nazirinin müavini Rikardo Herrero deyib.
Herrero bildirib ki, hökumətlərarası komissiyanın iclası çərçivəsində Kubada Azərbaycan mədəniyyəti günlərinin təşkil edilməsi planlaşdırılır. Tərəflər artıq müxtəlif əməkdaşlıq istiqamətlərində dörd protokol hazırlayıb və onların imzalanması növbəti iclasın gedişinə planlaşdırılıb.
"Hazırda bizim müzakirə mərhələsində olan onlarla layihəmiz var", - Herrero deyib.
Məqalə müəllifi ilə əlaqə ünvanı: [email protected]
