Azərbaycan, Bakı, 14 avqust / Trend , müxbir İ.Xəlilova /
"Azərbaycanda xüsusi razılıq və lisenziyalaşdırma sisteminin idarə edilməsi üçün 2009-cu ilin sonuna qədər prezident fərmanının verilməsi gözlənilir", - cümə günü Beynəlxalq Maliyyə Korporasiyasının (BMK) biznes mühitinin təkmilləşdirilməsi layihəsinin (AzBEE) rəhbəri Boris Divyak deyib.
"Son zamanlar Azərbaycan hökuməti xüsusi razılıq və lisenziyalaşdırma sisteminin, həmçinin biznesyoxlama inspeksiyası sisteminin təkmilləşdirilməsi üzrə Dünya Bankının məsləhət qrupu ilə kooperasiya edir", - Divyak bildirib.
"Dünya maliyyə-iqtisadi böhranı ilə əlaqədar bütün çətinlikləri nəzərə alaraq, hökumət ölkənin və sahibkarlığın dayanıqlı inkişafının təmin edilməsi üçün uzunmüddətli hədəflər müəyyən edib", - layihə rəhbəri qeyd edib.
Azərbaycanın kiçik və orta sahibkarlığı arasında keçirilmiş sorğu əsasında biznes mühitinin monitorinqi çərçivəsində xüsusi razılıq və lisenziyalaşdırma sisteminin qiymətləndirilməsinin yekunları üzrə BMK Azərbaycan hökumətinə öz təkliflərini təqdim edib.
Divyakın sözlərinə görə, hökumətə ölkədəki xüsusi razılıq və lisenziyaya malik olanların tam siyahısını formalaşdırmaq tövsiyə olunub ki, bu da başa çatmaq üzrədir. Siyahı İqtisadi İnkişaf Nazirliyi (İİN) tərəfindən AzBEE layihəsinin yardımı ilə tərtib olunur.
"Bu siyahının tərtib olunması fikri onlardan hansılarının bir-birini təkrarlamasını müəyyən etməkdən ibarətdir, - Divyak deyib. - Bundan sonra İİN üçün bu sahədə problemin texniki həlli üzrə xüsusi alət hazırlana bilər".
Korporasiya həmçinin müəyyən lisenziya növlərinin verilməsi üçün "vahid pəncərə" sistemini tətbiq etməyi də təklif edib ki, bu da vaxt və xərclərə qənaət etmək imkanı verəcək. Lisenziyaların siyahısının formalaşdırılmasından sonra ölkə hökumətinə, həmçinin razılıq sistemi üzrə vahid internet-portalın yaradılması da təklif ediləcək.
"Biz həm də "səssizlik üzrə" prinsipinin tətbiqinə də ümid edirik. Yəni xüsusi razılıqların alınmasına ayrılmış müvafiq müddətin bitiminə qədər mənfi cavab alınmazsa, bu, razılıq işarəsi kimi qəbul ediləcək", - Divyak bildirib.
Ölkə hökuməti ilə lisenziyaların verilməsi sisteminin idarə edilməsi üzrə aparıcı prinsipləri razılaşdırmaq da planlaşdırılır. Dünya təcrübəsində onlar, səhiyyənin mühafizəsi və ictimai təhlükəsizlik, ərtaf mühitin mühafizəsi və nadir (təbii telekommunikasiya) resursların paylanması diqqətə alınaraq üç əsas yerə bölünür.
"Tam siyahı üzrə lisenziya və xüsusi razılığın alınması prosesinin ətraflı təsviri üzrə təqdim olunacaq reyestrin yaradılması da gözlənilir. Onun yaradılması, bu məsələnin həllinin məsuliyyətinin artırılması məqsədilə, prezident fərmanından sonra başlanacaq", - Divyak hesab edir.
İlkin məlumatlara əsasən ölkədə 300 xüsusi razılıq və 54 lisenziya tətbiq olunur.
AzBEE layihəsi Azərbaycanda BP şirkəti və İsveçrənin iqtisadi məsələlər üzrə Dövlət Katibliyi (Seco) ilə birlikdə realizə edilir. Seco hökumətə 4,3 milyon dollar, BP isə 0,456 milyon dollar qrant təqdim edib.
Realizəsinə ötən il başlanılan AzBEE layihəsi beş il müddətinə hesablanıb.
Məqalə müəllifi ilə əlaqə ünvanı: [email protected]
