Azərbaycan, Bakı, 18 avqust / Trend , müxbir Ü.İsmayılova /
"Azərbaycanın daşınmaz əmlak bazarı xarici sərmayədarlar üçün yetərincə cəlbedici ola bilər. Onlar bazardakı qiymətlərin azalmasından yararlana və oradakı iştiraklarını fəallaşdıra bilər", - çərşənbə axşamı "MBA Group" konsaltinq şirkətinin baş direktoru Nüsrət İbrahimov deyib. [Azərbaycan qanunvericiliyinə əsasən, torpaq bazarı istisna olmaqla, ölkənin qeyri-rezidentləri digər daşınmaz əmlakın alınmasında iştirak edə bilərlər.]
"Bazardakı qiymətlərin düşməsi, həmçinin zəif fəallıq Azərbaycanın daşınmaz əmlak bazarına əlavə resurslar cəlb etməyə hazır olan xarici sərmayədarları cəlb edə bilər", - İbrahimov bildirib.
Ancaq bu gün, onun sözlərinə görə, xarici sərmayədarlar tərəfindən bazara giriş üçün müraciət daxil olmayıb.
Qlobal iqtisadi böhran şəraitində demək olar ki, bütün ölkələrin daşınmaz əmlak bazarları, qiymətlərin xeyli düşməsi səbəbindən böhranaqədərki dövrlə müqayisədə oraya daxil olmaq üçün daha cəlbedici görünür. Ancaq bir çox bazarlarda daşınmaz əmlaka olan qiymətlər azalmaqda davam edir. Bununla yanaşı, müxtəlif ölkələrdə bazarların müxtəlif bərpa perspektivləri var.
Potensial sərmayəçi baxımından hazırda böhrandan ən az zərər çəkmiş, öz iqtisadiyyatlarını daha tez bərpa etmək şansı olan, daşınmaz əmlak bazarının qiymət dərinliyinə çatmış, daşınmaz əmlak bazarının artımı üçün güclü fundamental əsasa malik ölkələrin daşınmaz əmlak bazarları favorit mövqeyinə çıxırlar.
Ölkədə tikinti tempi ilə bağlı İbrahimov deyib ki, hazırda kiçik və orta tikinti şirkətlərinin durumu ağırdır, çünki tikinti işlərinin tempi ilin əvvəlinə nisbətən 10-12 faiz, ötən ilin analoji dövrünə nisbətən 20-25 faiz aşağıdır.
Azərbaycanın daşınmaz əmlak bazarının fəallığı avqustun ilk 15 günü ərzində 5-6 faiz azalıb.
Məqalə müəllifi ilə əlaqə ünvanı: [email protected]
