Azərbaycan, Bakı, 21 avqust / Trend , müxbir İ.Xəlilova /
Azərbaycan Mərkəzi Bankının məlumatlarına əsasən, neft sektoru nəzərə alınaraq 2009-cu ilin yanvar-iyul aylarında manatın real effektiv məzənnəsi (REM) xarici ticarət ölkələrinin valyutasına nisbətdə ölkənin ümumi ticarət dövriyyəsində 2008-ci ilin dekabr ayı ilə müqayisədə 4,2 faiz, idxalda 3,6 faiz, ixracda isə 4,6 faiz ucuzlaşıb. Bu barədə cümə günü AMB-dən bildirilib. İyun ayı ilə müqayisədə nominal effektiv məzənnə 0,8 faiz, 0,9 faiz və 0,9 faiz bahalaşıb.
Tədqiqatlar da göstərib ki, Rusiyanın xarici ticarətdə payının (neft sektorunu nəzərə alaraq) REM-in artmasına təsiri 1,8 səviyyəsində, Qazaxıstanın 17,3 faiz, Yaponiyanın 2,8 faiz və Gürcüstanın payının təsiri isə 0,6 faiz səviyyəsində olub. ABŞ-ın payı məzənnənin azalmasına 3,7 faiz, Avropa zonası 6 faiz, İngiltərə 12,2 faiz, Ukrayna 10,8 faiz, İran 9 faiz, İsrail 4,9 faiz, Çin 1,6 faiz, Türkiyə isə 5,4 faiz səviyyəsində təsir göstərib.
Yanvar-iyul aylarında 2008-ci ilin dekabrına nisbətdə qeyri-neft sektorunda REM ümumi ticarət dövriyyəsində 2,3 faiz, idxalda 2,6 faiz, ixracda isə 1,4 faiz ucuzlaşıb.
Manat nominal olaraq Çin, İran, Gürcüstan, Türkiyə, Ukrayna, İngiltərə, Avropa valyutasına nisbətdə ucuzlaşıb, ABŞ, Rusiya, Qazaxıstan, Yaponiya və İsrail valyutasına nisbətdə isə möhkəmlənib.
Avqustun 21-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
