Azərbaycan, Bakı, 04 sentyabr / Trend , müxbir N.İsmayılova /
Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti "Slavyanka №1" markalı hazır məhsulda normadan artıq bağırsaq çöplərinin aşkar edilməsi ilə əlaqədar olaraq satışdan çıxarılmış 1747 litr suyun məhv edilməsi barədə qərar verib. Bu barədə cümə günü laborator müayinələrin nəticəsindən sonra idarədən verilən məlumatda deyilir.
Dövlət Xidmətinin 26-29 avqust tarixlərində apardığı yoxlamalar zamanı 4 ticarət obyektində aşkar edilərək laborator müayinə üçün nümunə götürülmüş 1747 litr həcmində "Slavyanka №1" əmtəə nişanlı suyun satışı laborator müayinənin nəticələri məlum olanadək dayandırılmışdı.
"Azərsu" Səhmdar Cəmiyyətinin Bakı Su Kəməri İstismar İdarəsinin Mərkəzi kimyəvi-bakterioloji laboratoriyasında aparılmış laborator müayinələrin nəticəsinə əsasən, həmin 4 obyektdən götürülmüş "Slavyanka №1" əmtəə nişanlı sularda bağırsaq çöplərinin miqdarının normadan çox olduğu müəyyən edilib. Beləliklə, satışdan çıxarılan məhsulun məhv edilməsi ilə bağlı qərar qəbul edilib.
Məqalə müəllifi ilə əlaqə ünvanı: [email protected]
