Azərbaycan, Bakı, 16 oktyabr / Trend , müxbir Ü.İsmayılova/
"İqtisadi Tədqiqatlar Mərkəzi" QHT Azərbaycanda sentyabr ayı ərzində inflyasiyaya dair hesablamalarını elan edib.
QHT-nin məlumatına görə, sentyabrda Azərbaycanda istehlak qiymətlərinin indeksi 0,12 faiz artıb. Bu dövr ərzində Bakıda qiymətlər 0,26 faiz artıb, regionlarda isə 0,02 faiz azalıb. Ay ərzində qeyri-ərzaq mallarında qiymətlər 0,91 faiz, xidmət sektorunda isə 0,17 faiz artıb. Ərzaq mallarında qiymətlərin 0,29 faizlik azalması müşahidə olunub.
Doqquz ay ərzində Azərbaycanda deflyasiya 1,84 faiz səviyyəsində müşahidə edilib. Qiymətlərin ən nəzərəçarpacaq azalması qeyri-ərzaq mallarında müşahidə edilib - 3,52 faiz. Hesabat dövrü ərzində qida məhsulları 3,40 faiz ucuzlaşıb, xidmətlər isə 4,50 faiz bahalaşıb.
Keçən ilin sentyabr ayı ilə müqayisədə cari ilin sentyabr ayında Azərbaycanda istehlak qiymətlərinin indeksi 3,52 faiz azalıb. O cümlədən, ərzaq malları üzrə illik deflyasiya 6,72 faiz, qeyri-ərzaq malları üzrə isə 3,48 faiz təşkil edib.