Azərbaycan, Bakı, 27 oktyabr / Trend , müxbir E.İsmayılov/
Murphy Shipping and Commercial Services beynəlxalq gəmi kirayələmə şirkəti 2009-2011-ci illərdə şirkətin Bakıdakı nümayəndəliyinin inkişafına 500 min dollar yatırmağı planlaşdırır. Bu barədə şirkətin icraçı direktoru Adeol Aqbabiak çərşənbə axşamı deyib.
"Növbəti iki ildə biz kadr potensialının inkişafına və Bakı ofisinin təchizatlaşmasına 0,5 milyon dollar yatırmağı planlaşdırırıq", - Aqbabiak deyib.
Aqbabiakın sözlərinə görə, şirkət 1993-cü ildən Bakıda fəaliyyət göstərir. O vaxtdan bu günə qədər şirkət Bakıdakı nümayəndəliyə 2,5-3 milyon dollara yaxın yatırım edib.
2008-ci ildə şirkətin 12 nümayəndəliyi üzrə xalis gəliri 2,2 milyon funt-sterlinqə yaxın olub. 2007-ci ildə bu göstərici 2,02 milyon funt-sterlinqə yaxın olub.
İqtisadi böhrana baxmayaraq, şirkət bu ildə gəlir həcmini keçənilki səviyyədə saxlamağı planlaşdırır.
"Böhrana baxmayaraq, biz gəlirin həcmini keçənilki səviyyədə saxlamağa çalışırıq. Ən pis halda 10-11 faizlik azalma gözlənilir. Lakin buna baxmayaraq, şirkət mənfəətlə fəaliyyət göstərir", - Aqbabiak vurğulayıb.
Onun sözlərinə görə, şirkətin ümumi gəlirinin 40 faizə yaxını Azərbaycanda həyata keçirilən əməliyyatların payına düşür.
"Keçən il şirkətin ümumi dövriyyəsi 15,5 milyon funt-sterlinqə yaxın olub. 2007-ci idə bu göstərici 15,06 milyon funt-sterlinq olub", - o deyib.
Şirkətin tərəfdaşları arasında AZMECO, Maersk Drilling, ABB, Nobel oil, ARDNŞ və digər şirkətlər var.
Murphy Shipping and Commercial Services 1975-ci ildə Nigeriyada yaradılıb. Hazırda şirkətin 12 ofis üzrə 350 əməkdaşı fəaliyyət göstərtir. Şirkətin Azərbaycan nümayəndəliyində 65 işçi çalışır. İşçilərin 95 faizini yerli kadrlar təşkil edib. İri layihələrin həyata keçirilməsi zamanı işçilərin sayı 100 nəfərə çatır.
Oktyabrın 27-nə olan rəsmi məzənnə 0,8032 AZN/USD, 1,3123 AZN/GBP təşkil eir.
Məqalə müəllifi ilə əlaqə ünvanı: [email protected]
