Azərbaycan, Bakı, 29 oktyabr / Trend , müxbir İ.Xəlilova/
Azərbaycan Beynəlxalq Bankının (ABB) 100 faizlik mülkiyyəti hesab olunan Azəri Card prosessinq mərkəzi Çində yeganə kart-prosessinq şirkəti sayılan China Union Pay (CUP) ilə inteqrasiya mövzusunda əməkdaşlığın imkanlarını nəzərdən keçirir. Bu barədə Azeri Card-ın biznesin inkişafı şöbəsinin müdiri Cahangir Məmmədov bildirib.
"Biz bu aktiv inkişaf edən, geniş müştəri bazasına malik və Asiya regionu banklarının fəal qoşulduğu ödəniş sistemi ilə əməkdaşlıq etməkdə maraqlıyıq", - Məmmədov deyib.
Onun sözlərinə görə, gələcək əməkdaşlıq planları çərçivəsində Azərbaycanda CUP kartlarının və Çin ödəniş sisteminin fəaliyyəti ərazisində Azeri Card tərəfindən xidmət göstərilən emitent kartlarının qəbulu imkanlarına baxılıb və müzakirə olunub.
Azeri Card prosessinq mərkəzinin əsası 1997-ci ildə qoyulub və hazırda Azərbaycanda 30 banka, Rusiyada (ABB-Moskva) və Özbəkistandakı (Royal Bank of Scotland) banklara xidmət göstərir, onlardan 25-i beynəlxalq ödəniş sistemlərinin üzvləri hesab olunur. Prosessinq mərkəzi fəaliyyət göstərdiyi andan plastik kartlar üzrə dövriyyə 20 dəfə artıb. Azeri Card sistemində hər gün bir milyona yaxın transaksiyalar buraxılır.
CUP 2002-ci ilin mart ayında 80-ə yaxın daxili milli maliyyə şirkətlərinin iştirakı ilə səhmdar maliyyə institutu kimi yaradılıb. Hazırda şirkətin 20 filialı və 165-ə yaxın üzv-bankı, 600 min POS-terminalı (Çindəki bütün POS-terminalların 99,5%-i), 86 min bankomatı (Çindəki bütün bankomatların 99,7%-i) var, buraxılan kartların sayı isə bir milyardı ötüb.
Şirkətin qərargahı Şanxayda yerləşir. Eyni zamanda, CUP kartlarından Çindən başqa 20-dən çox ölkədə (ABŞ, Yaponiya, Avstraliya, Vyetnam, Tailand, Almaniya, Fransa və.b) istifadə etmək olar.
Məqalə müəllifi ilə əlaqə ünvanı: [email protected]
