Azərbaycan, Bakı, 07 dekabr / Trend , müxbir N.İsmayılova/
Azərbaycanın İqtisadi İnkişaf Nazirliyi və yerli süd istehsalçıları rəhbərləri süd məhsulları bazarındakı mövcud vəziyyət, istehsalçılara dövlət dəstəyi tədbirlərinin daha da gücləndirilməsi ilə bağlı müzakirələr aparıblar. Bu barədə nazirliyin məlumatında deyilir.
İqtisadi inkişaf naziri Şahin Mustafayevin sözlərinə görə, ölkə iqtisadiyyatının bütün sahələrində olduğu kimi, ərzaq məhsullarının istehsalı sahəsində də ciddi irəliləyişlər nəzərə çarpır.
"Ölkəmizdə rəqabətqabiliyyətli və yüksək keyfiyyətli süd məhsulları istehsal olunur və istehsalın həcmi davamlı olaraq artır, - nazir deyib. - Azərbaycanın özünü süd məhsulları ilə tam təmin etməsi reallığa çevrilməkdədir. Bundan sonra diqqət daha çox süd məhsullarının ixracının artırılmasına yönəldilməlidir".
Süd məhsulları istehsal edən müəssisələrin rəhbərləri isə çıxışlarında dövlətin istehsalçılara qayğısından, sahibkarlar üçün yaradılmış əlverişli işgüzar mühitdən razılıqlarını bildiriblər.
Görüşdə sahibkarlar tərəfindən süd məhsullarının istehsalının artırılması, ixracının genişləndirilməsi ilə bağlı səsləndirilən təkliflərin reallaşdırılması imkanlarının araşdırılacağı qeyd edilib.
Məqalə müəllifi ilə əlaqə ünvanı: [email protected]
