...

Dünya Bankı Roqun layihəsinin ekspertizasına nəzarət edəcək

Biznes və iqtisadiyyat xəbərləri Materials 25 Mart 2010 17:05 (UTC +04:00)
Dünya Bankı (DB) bildirib ki, Roqun SES-in inşasında onun iştirakı layihənin texniki, ekoloji və sosial baxımdan məqsədəuyğunluğundan asılı olacaq. Bu barədə DB-nin Avropa və Mərkəzi Asiya regionu üzrə vitse-prezidenti Filip Le Ueyrunun Özbəkistan hökumətinə müraciətində deyilir. Müraciət cümə axşamı "Pravda Vostoka" qəzetində dərc edilib.

Özbəkistan, Daşkənd, 25 mart / Trend , müxbir D.Əzizov/

Dünya Bankı (DB) bildirib ki, Roqun SES-in inşasında onun iştirakı layihənin texniki, ekoloji və sosial baxımdan məqsədəuyğunluğundan asılı olacaq. Bu barədə DB-nin Avropa və Mərkəzi Asiya regionu üzrə vitse-prezidenti Filip Le Ueyrunun Özbəkistan hökumətinə müraciətində deyilir. Müraciət cümə axşamı "Pravda Vostoka" qəzetində dərc edilib.

Qeyd olunur ki, bank aprelin 20-27-də Tacikistana yüksək səviyyəli texniki missiyasını göndərəcək. Məqsəd gələcək monitorinqin aparılması və Roqun meydançasında işlərin qiymətləndirilməsidir. Missiyaya DB-nin bəndlər üzrə yüksək ixtisaslı eksperti və su layihələri üzrə mütəxəssislər daxildir.

Bundan əlavə, apreldə Filip Le Ueyru və DB-nin institusional müdafiə mexanizmləri üzrə müşaviri Stefan Lintner tədqiqatlarda beynəlxalq müstəqil ekspertlərin iştirakı məsələsinin müzakirəsi üçün transsərhəd çaylar hövzəsi ölkələrinə səfər etmək niyyətindədir.

Texniki-iqtisadi, ekoloji və sosial ekspertiza texniki əsaslılığın, həmçinin, ekoloji və sosial risklərin, təklif edilən layihənin səmərəliliyinin qiymətləndirilməsinin aparılmasına yönələcək. Tədqiqatlar Dünya Bankının göstərişlərinə və xüsusi müdafiə mexanizmlərinə uyğun olaraq aparılacaq.

2009-cu ilin sentyabr və dekabrında DB komandası layihə meydançasında olub. O zaman aparılan tikinti işləri konstruksiyaların bərpası üzrə reabilitasiya tədbirlərini, yeraltı işləri və 1993-cü ildə sel nəticəsində güclü zədələnmiş və sonradan dağılmağa məruz qalmış yolların bərpasını əhatə edib.

"Tikinti işlərinin qrafiki ilə texniki-iqtisadi, ekoloji və sosial ekspertiza arasında uyğunluğun və ardıcıllığın təminatı məsələsinin ciddiliyi, xüsusilə birləşdirici bəndin inşası ilə bağlı Tacikistan hökumətinin diqqətinə çatdırılıb. Tacikistan hökuməti ilə qarşılıqlı anlaşma əldə olunub və onlar bərpa işlərindən kənara çıxan gələcək tikinti işlərinin sözügedən ekspertizaya əsaslanacağı barədə öhdəlik götürüblər", - müraciətdə deyilir.

Gələcəkdə planlaşdırılan tikinti işləri ekspertizanın nəticələrinə əsasən tutuşdurulacaq. Nəticələr texniki layihələrdə və tikintinin hər mərhələsinin həyata keçirilməsində nəzərə alınacaq.

Tacikistan hökuməti ekspertizanın nəticələrinin müstəqil beynəlxalq ekspertlər tərəfindən müzakirə olunmasına və onların öz rəylərini verməsinə tərəfdar olduğunu bildirib. Əlavə olaraq, Tacikistan hökuməti tikintiyə nəzarətin həyata keçirilməsi və onun keyfiyyətinin müstəqil qiymətləndirilməsi məqsədilə Dünya Bankının DB üçün məqbul olan texniki tapşırıqlar və ixtisaslar əsasında seçilmiş inşaat mütəxəssislərinin işə götürülməsinə dair təklifi ilə razılaşıb.

"Biz Özbəkistanın və bütün Mərkəzi Asiya ölkələrinin tələblərini dinləməyə və reaksiya verməyə, xüsusilə də obyektiv, qərəzsiz və ardıcıl informasiya və məsləhətlər verilməsi sahəsində sadiq qalırıq. Bankın maliyyələşdirmə və gələcəkdə layihədə istənilən iştirakla bağlı qərarı ekspertizanın nəticələrindən asılı olacaq", - Le Ueyru bildirib.

Xəbər lenti

Xəbər lenti