Azərbaycan, Bakı, 24 aprel /Trend, müxbir Ü.İsmayılova/
Bakıda yaradılmış Standartlar Fondunun bazasında yaxın vaxtlarda onlayn şəbəkə yaradılacaq. Məqsəd məlumatın operativ əldə olunması və daha səmərəli istifadədir. Bu barədə cümə günü Standartlaşdırma, Metrologiya və Patent üzrə Dövlət Komitəsinin sədri Ramiz Həsənov komitənin birinci rübdə fəaliyyətinin yekunlarına həsr olunmuş kollegiya iclası zamanı bildirib.
"Qısa müddət ərzində ölkədə ərzaq malları sahəsində beynəlxalq standartlara uyğun texniki şərtləri tətbiq etmək lazımdır", - Həsənov deyib.
Onun sözlərinə görə, yerli istehsalçıların xarici bazarlara çıxmasının təmin olunması, həmçinin ölkənin ixrac potensialının genişləndirilməsi üçün bu istiqamətdə avrostandartların tətbiqi mühüm elementdir.
Həsənov deyib ki, hazırda komitə ərzaq mallarında mikrobioloji normaların laborator təhlilini aparır, halbuki, bu analizlər ərzaq mallarının digər parametrlərini də əhatə etməlidir.
"Bununla əlaqədar Azərbaycan Standartlar İnstitutu avrostandartların tətbiqi məsələsini müzakirə etməlidir", - Komitə sədri qeyd edib.