Azərbaycan, Bakı, 22 iyun /Trend, müxbir N.İsmayılova/
Özəl sektorun inkişafı üzrə İslam Korporasiyası Azərbaycanda layihələrin sayının artırılmasında maraqlıdır. Bunu korporasiyanın icraçı direktoru Xalid əl-Əbudi çərşənbə axşamı Azərbaycan və digər MDB ölkələrinin biznes və investisiya üzrə keçirilən konfransının yekunlarına həsr edilən mətbuat konfransında deyib.
"Hazırda ölkədə korporasiya tərəfindən yerli 7-8 bank maliyyələşdirilir və bazar etəsi Azərbaycan Beynəlxalq Bankına 15 milyon dollar dəyərində üçüncü kredit xəttinin verilməsi barədə saziş imzalanıb", - o bildirib.
Onun sözlərinə görə, korporasiyanın Azərbaycandakı portfeli hazırda 51 milyon dollar təşkil edir.
"Biz daha çox sərmayə yatırmağa hazırıq, lakin bu, bizə təqdim edilən hazır layihələrin olmasından asılıdır. Tərəfimizdən maliyyələşdirmənin həcminin genişləndirilməsinə maraq var və hazırda bir neçə layihə nəzərdən keçirilir", - korporasiya rəhbəri vurğulayıb.
Özəl sektorun inkişafı üzrə İslam Korporasiyası İslam İnkişaf Bankının tərkib hissəsi olmaqla, çoxşaxəli təşkilatdır.
Özəl sektorun inkişafı üzrə İslam Korporasiyası İİB-nin İcraedici Direktorlar Şurası tərəfindən 1999-cu ildə bankın Ciddədə keçirilən 24-cü illik toplantısında təsis edilib. Korporasiyanın mənzil-qərargahı Səudiyyə Ərəbistanının Ciddə şəhərindədir.
