Azərbaycan, Bakı, 23 iyun /Trend, müxbir S.Ağayeva/
Yunanıstan azərbaycanlı sərmayədarlara ölkənin özəlləşdirmə prosesində iştirak etməyi təklif edir. Bunu çərşənbə günü Trend-ə Yunanıstanın Azərbaycandakı səfir Yoannis Metaksas deyib.
Yunanıstanın Azərbaycandakı səfirliyi yaxın vaxtlarda Azərbaycan hökumətinə və özəl sektora aeroport, liman, dəmiryol məntəqələri kimi özəlləşdirilməsi nəzərdə tutulan obyektlərin siyahısını təqdim edəcək.
"Bu, azərbaycanlı iş adamları üçün yaxşı imkanlar açır", - diplomat hesab edir.
Diplomat Yunanıstanın yaxın vaxtlarda avrozonadan çıxacağı ilə bağlı yaranan məlumatı da təkzib edib.
"Yunanıstanın avrozonadan çıxması və ya digər valyutaya keçməsi ilə bağlı planı yoxdur", - səfir qeyd edib.
"Hazırda Yunanıstan böhrandan çıxmaq üzrə proqramın həyata keçirilməsi yolu ilə gedir və bu, müvəffəqiyyətlə həyata keçirilir", - diplomat vurğulayıb.
Azərbaycan Dövlət Statistika Komitəsinin məlumatına görə, cari ilin yanvar-aprel aylarında iki ölkə arasında mal dövriyyəsi 79,9 milyon dollar təşkil edib.