Azərbaycan, Bakı, 13 iyul /Trend, müxbir İ.Xəlilova/
Azərbaycan-Pakistan lizinq şirkəti MCB Lizinq 2011-ci ildə MDB məkanında öz fəaliyyətini genişləndirməyi planlaşdırır. Çərşənbə axşamı "MCB Lizing" liziq şirkətinin Azərbaycan tərəfinin təsisçisi, şirkətin Müşahidəçilər Şurasının üzvü Namiq Səfərovun dediyinə görə, bu Pakistan bankı MCB-nin Azərbaycanda açdığı MDB-də yeganə lizinq şirkətidir və MCB Lizinq-in ölkədən xaricdə ilk filiallarının Kiyev və Tbilisidə açılması planlaşdırılır.
"Biz artıq 2011-ci ilin yanvarına MCB Lizinq-in Kiyevdə, martda isə Tbilisidə filiallarını açmağı planlaşdırmışıq", - Səfərov deyib.
Seçim məhz gürcü və Ukrayna bazarlarının üzərinə düşüb, belə ki, Pakistan bankı oralarda tədqiqatlar aparıb.
"Ukrayna bazarı lizinq xidmətlərinin inkişafı üçün maraqlıdır, gürcü bazarına çıxış isə indi orada çoxlu Azərbaycan şirkətlərinin təmsil olunması ilə əlaqədardır. Odur ki, MCB Lizinq-in bu bazara çıxışı Azərbaycan kapitalına dəstək olacaq", - Səfərov qeyd edib.
Bu planlarla əlaqədar olaraq MCB Lizinq 2011-ci ildə öz nizamnamə kapitalını indiki 1,5 milyon dollardan 36 milyon dollaradək artırmağı planlaşdırıb.
Şirkət 13 iyul 2010-cu il tarixdə fəaliyyətə başlamasını rəsmən elan edib. "MCB Lizinq" lizinq şirkəti ölkənin vergi orqanlarında 15 oktyabr 2009-cu il tarixdə dövlət qeydiyyatdan keçib. Şirkətin nizamnamə kapitalı 1,5 milyon manat təşkil edir. "MCB Lizinq"in təsisçiləri iştirak payının 70 faizinə malik Pakistanın MCB Bank LTD şirkəti və Namiq Səfərovdur.
Pakistanın MCB bankının altı milyard dollardan çox aktivi, 1500 filialı var və dünyanın səkkiz ölkəsində təmsil olunub. O, əsas fəaliyyəti tekstil sənayesində və dünyanın aparıcı brendləri üçün məhsul istehsalında cəmləşən Nishat Group şirkətlər qrupuna daxildir.
