Аzərbaycan, Bakı, 28 avqust /Trend, müxbir N.İsmayılova/
Azərbaycan Əmlak Məsələləri Dövlət Komitəsi texniki yod və kalium yod istehsalçısı "Bakı Yod" SC-nin səhmlərinin satışı üzrə investisiya müsabiqəsi elan edib. Bu barədə şənbə günü Dövlət Komitəsindən məlumat verilib.
Satışa 94,46 faiz həcmində səhm paketi qoyulub ki, onun 85 faizi investisiya müsabiqəsinin standart paketinin səhmləri, 9,46 faizi isə əmək kollektivinin səhmlərinin güzəştli satışından sonra yerdə qalandır.
Müsabiqədə Azərbaycan və xarici investorların fiziki və hüquqi şəxsləri iştirak edə bilərlər.
İddiaçılar yeni texnologiyaların tətbiqi, istehsal olunan məhsulun keyfiyyətinin artırılması, mal çeşidlərinin genişləndirilməsi, iş yerlərinin bərpası üzrə təklifləri investisiya proqramına təqdim etməlidirlər.
Bakının Sabunçu rayonunda yerləşən "Bakı Yod" texniki yod və kalium yodun istehsalı üzrə ixtisaslaşıb.
SC-nin nizamnamə kapitalı avqustun 1-nə olan məlumatlara görə, 202,968 min manat təşkil edir ki, bunlara da hər birinin dəyəri iki manat olmaqla 101 484 səhm buraxılıb. Müsabiqənin mövzusu nominal dəyəri 191,718 min manat olan 95 859 səhmdir.
Müəssisənin 198,541 min manat dəyərində borcu var, o cümlədən əməkhaqları üzrə borclar 74,884 min manat, xammal, xidmətlər və işə görə borclar 123,657 min manat təşkil edib. Bununla yanaşı, müəssisənin debitor borcları 164,455 min manat təşkil edir. Müəssisə 1930-cu ildən bəri fəaliyyət göstərir.
İddiaçılar müsabiqənin şərtləri, xüsusi planları ilə tanış olmaq və əlavə məlumat əldə etmək üçün 2010-cu il 27 sentyabr saat 10:00-dan 17:30-dək Bakı, Y.Səfərov küç, 20 ünvanına müraciət edə bilərlər. Sənədlər və təkliflər 27 sentyabr saat 10:00-dan 17:30-dək qəbul olunur.
Təkliflərə 2010-cu il 29 sentaybr saat 11:30-dək Dövlət Komitəsinin binasında baxılacaq.
Avqustun 28-nə olan rəsmi məzənnə 0,8037 AZN/USD təşkil edir.