Azərbaycan, Bakı, 8 sentyabr /Trend, müxbir N.İsmayılova/
2010-cu ilin avqustunda Azərbaycanda istehlak malları üzrə qiymətlər və xidmətlərlə bağlı tariflər əvvəlki ayla müqayisədə 0,7 faiz artıb. Bu barədə Dövlət Statistika Komitəsinin məlumatında deyilir.
Avqustda ərzaq mallarının qiymətləri 1 %, əhaliyə göstərilən pullu xidmətlər üzrə tariflər və qeyri-ərzaq mallarının qiymətləri 0,2% bahalaşıb.
Ötən ay buğda çörəyi, makaron məmulatları, brınza, yumurta, kərə yağı, bitki yağı, kefir, dana əti, banan, limon, şabalıd, kələm, çuğundur, kök, kartof, pomidor, xiyar kimi ərzaq məhsullarının qiymətləri bahalaşıb.
Həmçinin, ay ərzində toyuq əti, təzə balıq, pastrelizə olunmamış süd, xama, alma, armud, qarpız və yemiş, üzüm, badımcan və soğanın qiymətlərində azalma müşahidə olunub. Avqustda qeyri-ərzaq malları arasında geyim və ayaqqabının qiymətləri azalıb, tikinti materialları isə bahalaşıb.
Avqustda əhaliyə göstərilən pullu xidmətlər üzrə MDB ölkələrinə hava və dəmir yolu nəqliyyatı ilə sərnişin daşımalarının tarifləri bahalaşıb.