Azərbaycan, Bakı, 17 sentyabr /Trend, müxbir İ.Xəlilova/
Azərbaycan Əmlak Məsələləri Dövlət Komitəsi müsabiqə vasitəsilə "Lənkəran Çay-5" ASC-nin səhmlərinin satışının başa çatmasını elan edib. Bu barədə cümə günü Dövlət Komitəsindən bildiriblər. Müəssisənin pul hərracından qalan və investisiya müsabiqəsi vasitəsilə satışa çıxarılan səhmlərinin 30 faizinə fiziki şəxs sahib çıxıb.
"İnvestor istehsalat məqsədləri üçün müəssisəyə altı ay ərzində 259,9 min manat yatırmaq barədə üzərinə öhdəlik götürüb", - Dövlət Komitəsindən deyiblər.
Bu vəsaitlər çay tinglərinin becərilməsi üçün fermentasiya sexinin emalı, çayın təmizlənməsi üçün kiçik sexin, laboratoriya otaqlarının, işçilərin və təcrübə keçən tələbələrin treninq otaqlarının tikintisi məqsədilə yeni texnologiyaların tətbiqi ilə istehsalatın genişləndirilməsinə hesablanıb.
İnvestisiya proqramı çayın təmizlənməsi və qablaşdırılması üçün avadanlığın alınması və quraşdırılması, müəssisənin inzibati binasının əsaslı təmiri, çay toxumlarının alınması və əkilməsi, eləcə də çay tinglərinin ehtiyatının yaradılmasını nəzərdə tutur.
İnvestisiya layihəsinin həyata keçirilməsi nəticəsində çay istehsalının üç dəfə artırılması, 14 hektarlıq torpaq sahəsində yeni çay plantasiyasının yaradılması planlaşdırılır. Bu, ekoloji təmiz çay məhsulunu əldə etməyə imkan verəcək.
Bununla yanaşı, investor dövlət büdcəsinə 45 min manat köçürmək barədə də öhdəlik götürüb. İnvestisiya layihəsinə əsasən, müəssisədə istehsalın bərpası və inkişafı nəticəsində 20 yeni iş yerinin yaradılması, digər sosial tədbirlərin keçirilməsi nəzərdə tutulub.
"Lənkəran Çay-5" çay xammalının emalında və onun satışında ixtisaslaşıb və Lənkəran rayonunda yerləşir.
SC-nin nizamnamə kapitalı 829,5 min manat təşkil edir. Bu məbləğə hər birinin nominal dəyəri iki manat olmaqla 414 741 səhm buraxılıb. Müsabiqənin predmeti ümumi nominal dəyəri 248 844 manat olan 124 422 səhmdir.
1988-ci ildən fəaliyyət göstərən müəssisənin 26,6 min manat, o cümlədən əməkhaqları üzrə 1,67 min manat, xammal və göstərilən xidmətlərin ödənişləri üzrə 6,9 min manat borcu var. Müəssisənin debitor borcları isə 19,67 min manat təşkil edir.
Sentyabrın 17-nə olan rəsmi məzənnə 0,8033 AZN/USD təşkil edir.
