Özbəkistan, Daşkənd, 21 sentyabr /Trend, müxbir D.Əzizov/
Çərşənbə axşamı Daşkənddə iqtisadi əməkdaşlıq üzrə Özbəkistan-Azərbaycan hökumətlərarası komissiyasının doqquzuncu iclası işinə başlayıb. İclas çərçivəsində Özbəkistan-Azərbaycan ikitərəfli ticari-iqtisadi əməkdaşlığının genişləndirilməsi üzrə ümumi məsələlərin müzakirəsi planlaşdırılıb.
Özbəkistanın Xarici İqtisadi Əlaqələr, İnvestisiya və Ticarət Nazirliyinin məlumatına əsasən, sentyabrın 21-nə və 22-nə iki ölkənin nazirlik və idarə nümayəndələrinin iştirakı ilə işçi ekspert qrupların iclası planlaşdırılıb.
Hökumətlərarası komissiyanın plenar iclası cümə axşamı - sentyabrın 23-də keçiriləcək. Plenar iclasda Azərbaycan nümayəndə heyətinə Baş nazirin müavini Yaqub Eyyubov başçılıq edir.
Həmin gün axşam razılaşdırılan sazişlər çərçivəsində sənədlərin imzalanması gözlənilir.
Özbəkistan-Azərbaycan hökumətlərarası komissiyası 1998-ci il fevralın 26-da yaradılıb. Onun son iclası 2008-ci ilin sentyabrında Bakıda keçirilib.
Rəsmi statistikaya əsasən, 2009-cu ildə Özbəkistan və Azərbaycan arasında mal dövriyyəsi 35 faiz azalaraq 42 milyon dollar təşkil edib.
2010-cu ilin altı ayının yekunlarına görə, Özbəkistan və Azərbaycan arasında xarici mal dövriyyəsi 9,2 milyon dollar təşkil edib. Bu göstərici ötən ilin analoji dövründə 23,6 milyon dollar olub. Özbəkistan Azərbaycana 7,3 milyon dollar məbləğində (2009-cu ilin yanvar-iyun aylarında 17,6 milyon dollar) mal ixrac edib, idxal üzrə alışlar 1,9 milyon dollar (6 milyon dollar) təşkil edib.
Özbəkistan Azərbaycana maşın və avadanlıq, ərzaq, kimya sənayesi məhsulları, rəngli və qara metal, enerjidaşıyıcıları ixrac edir. Azərbaycandan Özbəkistana ixrac edilən məhsullar nomenklaturasına avadanlıq və kimya sənayesi məhsulları daxildir.
