Azərbaycan, Bakı, 8 noyabr /Trend, müxbir A.Axundov/
"Azəri-Çıraq-Günəşli" (AÇG) dəniz yataqları blokunda neft hasilatının artırılmasını nəzərdə tutan "Chirag oil project" (COP) layihəsi üzrə risklərin sığortalanması çərçivəsində müqavilələrin imzalanması başa çatıb. Bu barədə bazar ertəsi "Paşa Sığorta" şirkətinin idarə heyətinin sədri Nofəl Rzayev bildirib.
"COP layihəsi üzrə risklərin bölüşdürülməsi artıq başa çatıb, broker və təkrar sığortaçılar bütün polisləri təsdiqləyiblər. Operator BR üçün polis artıq buraxılıb", - Rzayev bildirib.
Onun sözlərinə görə, tikintinin bütün dövrü üçün tikinti komponentlərinin sığortalanması üzrə müqavilələr imzalanıb.
"Tikinti işləri 4 il müddətinə sığortalanıb, istismar riskləri isə illik sığortalanır", - Rzayev deyib.
"Paşa Sığorta" ASC 2008-ci ildən Xəzərin Azərbaycan sektorundakı AÇG neft yataqları blokunun, "Şahdəniz" qaz kondensat yatağının və Bakı-Tbilisi-Ceyhan boru kəmərinin lokal sığorta tərəfdaşıdır.
"Paşa Sığorta" 2008-ci ilin iyulunda Londonda strateji lokal sığorta tərəfdaşı rolunda sertifikatlaşmadan keçib.
Sığortaçılar və neft-qaz layihələri operatoru BP arasında müqavilə AÇG neft yataqları bloku, "Şahdəniz" qaz kondensat yatağının əməliyyat risklərinin, məsuliyyət və terror risklərinin və əmlak risklərinin, eləcə də Bakı-Tbilisi-Ceyhan boru kəmərini istismarı risklərinin təmin olunması üzrə sığorta polislərinin rəsmiləşdirilməsi prosesini nəzərdə tutur.
"Paşa Sığorta" "Marsh" broker firmasının və aparıcı beynəlxalq təkrar sığorta şirkətlərinin tərəfdaşıdır.
"Paşa Siğorta" "Paşa Holdinq" qrupunun üzvüdür və sığortanın 31 növü üzrə korporativ və fərdi müştərilərə xidmət göstərir. 20 milyon manat nizamnamə kapitalı və 28 milyon manat ümumi aktivləri ilə "Paşa Sığorta" kapitallaşdırmanın həcminə görə, ölkənin ilk üç sığortaçısı siyahısına daxil olmaqla, sığorta sektorunda biznesin rentabelliliyini qorumaqda ən yüksək göstəricilərə malikdir. Şirkətin nizamnamə kapitalı 20 milyon manatdır.
2007-ci ildən "Paşa Sığorta" Böyük Britaniyanın "Moody International" agentliyi tərəfindən sığorta məhsullarının ISO 9001:2000 keyfiyyət idarəetmə standartlarına və xidmətlərinə uyğunluq səviyyəsinə görə sertifikatla təltif olunub. 2009-cu ildən etibarən, "Paşa Sığorta" BMT-nin insan hüquqlarının, ətraf mühitin müdafiəsi və korrupsiyanın qarşısının alınması üzrə Qlobal Müqavilənin (UN Global Compact Initiative) iştirakçısıdır.
Noyabrın 8-də rəsmi məzənnə 0,7999 AZN/USD təşkil edir.
