Azərbaycan, Bakı, 7 dekabr /Trend, müxbir Ü.İsmayılova/
Azərbaycan Mərkəzi Bankı yanında fəaliyyət göstərən Azərbaycan İpoteka Fondu "Elektron ipoteka" proqramı çərçivəsində mal və xidmətlərin alınması məqsədi ilə tender elan edib. Bu barədə tender komissiyasının çərşənbə axşamı yayılan məlumatında deyilir.
Satın alınacaq mal və xidmətlər bazarın bütün iştirakçıları arasında aparılan biznes əməliyyatların tam avtomatlaşdırılması və yeni elektron idarəetmə sisteminin yaradılması üçün istifadə olunacaq.
Elektron idarəetmə sistemi vətəndaşların müraciətlərinin elektron qəbulunu, kreditlərin verilməsini, müvəkkil banklarla sənəd dövriyyəsi və mübadiləsini, hesabatların təqdim edilməsini, vahid reyestrin yaradılmasını və s. nəzərdə tutur.
"Tenderin şərtlərinə görə, "Elektron ipoteka"nın tətbiqi 18 ay ərzində başa çatmalıdır", - tender komissiyasının məlumatında deyilir.
Tenderdə iştirak haqqı bir min manat təşkil edir.
Tender təklifləri 2011-ci il yanvarın 10-dək qəbul edilir. Tender 2011-ci il yanvarın 11-də Azərbaycan İpoteka Fondunun inzibati binasında keçiriləcək.
Bir müddət əvvəl Azərbaycan Mərkəzi Bankının (AMB) idarə heyətinin sədri Elman Rüstəmovun dediyi kimi, Azərbaycan İpoteka Fondu ipoteka kreditlərinin verilməsi zamanı insan faktorunun minimallaşdırılmasını nəzərdə tutan "Elektron ipoteka" layihəsini hazırlayır.
Onun sözlərinə görə, layihə işə salındıqdan sonra əhalinin müraciəti və ipoteka kreditinin alınması üçün sənədlərin təqdim edilməsi prosesində insan faktoru tamamilə aradan qaldırılacaq və müraciətlər müvəkkil banklar vasitəsilə birbaşa İpoteka Fonduna daxil olacaq.
Cari ilin üç rübü ərzində AİF-in xətti ilə 73,5 milyon manat məbləğində kreditlər verilib. Ölkədə 2006-cı il martın 1-dən başlayan ipoteka kreditləşməsi prosesi 2007-ci ilin yayında vəsait çatışmazlığı səbəbindən dayandırılmışdı. Proses 2009-cu il iyunun 1-də bərpa edilib.