Azərbaycan, Bakı, 15 dekabr /Trend/
Yanvar-noyabr aylarında Azərbaycanın nəqliyyat sektorunda 179,9 milyon ton müxtəlif yüklər daşınıb ki, bu da 2009-cu ilin həmin dövründə olduğundan 3,1 faiz çoxdur. Bu barədə Azərbaycan Dövlət Statistika Komitəsi məlumat verib.
Yanvar-noyabr aylarında daşınan yüklərin ümumi həcminin 74 faizi özəl sektorun payına düşür. Bu ilin yanvar-noyabr aylarında yüklərin ümumi həcminin 50,9 faizi avtomobil nəqliyyatı ilə, 32 faizi boru kəmərləri, 11,2 faizi dəmiryol, 5,9 faizi isə dəniz nəqliyyatı ilə daşınıb.
Yanvar-noyabr aylarında 1,3 milyard sərnişin daşınıb ki, bu da ötən ilin analoji dövr göstəricisindən 4,4 faiz çoxdur. Sərnişinlərin əsas hissəsi (86,5 faiz) avtomobil nəqliyyatı və metro ilə (13,1 faiz) daşınıb.
Dəmiryol nəqliyyatı ilə 20,2 milyon ton müxtəlif yüklər daşınıb ki, bu da 2009-cu ilin yanvar-noyabrından 6,7 faiz çoxdur.
Dəniz nəqliyyatı ilə 106 milyon ton müxtəlif yüklər daşınıb. Bu, ötən ilin yanvar-noyabr ayında olduğundan 12,7 faiz azdır. Daşınan yüklərin bütün həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi yanvar-noyabrda 9,6 milyon ton təşkil edib ki, bu da ötən ilin analoji dövründəkindən 26,6 dəfə çoxdur.
Avtomobil nəqliyyatı ilə 91,5 milyon ton yük daşınıb. Bu, ötən ilin yanvar-noyabr aylarındakından 5,9 faiz çoxdur. Sərnişindaşımanın həcmi 1,1 milyard nəfər (artım 7,8 faiz) təşkil edib. Sərnişinlərin 96,4 faizi avtobuslarla, 3,6 faizi minik avtomobilləri ilə daşınıb.
Metropolitenlə sərnişindaşımanın həcmi 164,2 milyon nəfər təşkil edərək 13,1 faiz azalıb.
Yanvar-noyabr aylarında hava nəqliyyatı ilə 940,6 min sərnişin daşınıb. Daşımaların həcminin 21,8 faizi özəl sektorun payına düşüb.
Bu ilin yanvar-noyabrında Avrasiya nəqliyyat dəhlizi ilə Azərbaycan ərazisindən 42,5 milyon ton yük daşınıb ki, bu da ötən ilin analoji dövr göstəricisindən 8 faiz çoxdur. Yanvar-noyabr aylarında dəhliz çərçivəsində 166,5 milyon nəfər daşınıb ki, bu da 2009-cu ilin yanvar-noyabr aylarında olduğundan 8,1 faiz çoxdur.