Azərbaycan, Bakı, 15 dekabr /Trend, müxbir Ü.İsmayılova/
Azərbaycanda daşınmaz əmlakın qeydiyyatının tam avtomatlaşdırılması sistemi iki - iki il yarım ərzində Dünya Bankının "Daşınmaz əmlakın qeydiyyatı" birgə layihəsi çərçivəsində tətbiq olunacaq. Bu barədə çərşənbə ügün Azərbaycanın Əmlak Məsələləri Dövlət Komitəsi sədrinin müavini Rüstəm Şahbazov bildirib.
"Azərbaycanda daşınmaz əmlakın qeydiyyatının tam avtomatlaşdırılması sisteminin işlənməsi ilə bağlı hazırlıq işləri aparılır və artıq ilk uğurlar var", - Şahbazov deyib.
Onun sözlərinə görə, son illər ölkədə daşınmaz əmlakın qeydiyyatı sisteminin təkmilləşdirilməsi ilə bağlı uğurlu iş aparılıb. Bu dövrdə göstərilən xidmətlərin keyfiyyəti artırılıb, eləcə də sistemin şəffaflığı və effektivliyi təmin olunub.
"Azərbaycanda daşınmaz əmlakın qeydiyyatı sisteminin təkmilləşdirilməsi iqtisadi və investisiya mühitinin, ölkənin iqtisadi sisteminin təkmilləşdirilməsi üçün təkan kimi qiymətləndirilir", - Şahbazov bildirib.
Dövlət Komitəsinin sədr müavininin sözlərinə görə, artıq ölkədə bu sistemin təkmilləşdirilməsi üçün hüquqi baza yaradılıb və gələcəkdə ondan müvafiq icra halimiyyəti orqanları və biznes infrastrukturları tərəfindən istifadə olunacaq.
Azərbaycan hökuməti və Dünya Bankı 2007-ci ilin iyulunda daşınmaz əmlakın vahid kadastr sisteminin birgə tətbiqi barədə saziş imzalayıblar. Layihə bir neçə hissədən ibarətdir - daşınmaz əmlak qeydiyyatı; dövlət əmlakı idarəsi və reyestri; baza torpaq xəritəsi və torpaq kadastrı; treninqlər, siyasətin formalaşması və layihənin idarəsi. Layihənin dəyəri 38,57 milyon təşkil edir, onun 30 milyon dolları Dünya Bankının kreditinin payına düşür. Kredit resursları beşillik güzətli dövr ərzində 20 illik müddətə ayrılıb.