Azərbaycan, Bakı, 18 dekabr /Trend, müxbir İ.Xəlilova/
2010-cu ilin yanvar-noyabr aylarında Azərbaycan xarici ölkələrə (MDB ölkələri istisna olmaqla) 3,918 milyard dollar həcmində mal idxal edib ki, bu da ölkə idxalının ümumi həcminin 68,59 faizini təşkil edir. Bu barədə şənbə günü Dövlət Gömrük Komitəsindən (DGK) məlumat verilib.
Uzaq xarici ölkələrdən Azərbaycana avadanlıq və mexaniki qurğular (ümumi idxalın 24,54 faizi), quru nəqliyyat vasitələri (9,76 faiz), elektrik maşınları və avadanlıqları, onların hissələri (9,04 faizi), qara metaldan məmulatlar (8,32 faiz), şəkər və qənandı məmulatları (4,04 faiz) gətirilib.
Göstərilən dövrdə Azərbaycandan uzaq xarici ölkələrə 17,588 milyard dollar məbləğində (ölkədə ixracın 90,64 faizi) mal ixrac olunub.
Əsasən mineral yanacaqlar, neft məhsulları, bitum mineralları (ümumi ixracın 97,99 faizi), qara metallar (0,39 faiz), təbii və süni yetişdirilmiş mirvari, qiymətli və yarımqiymətli daşlar, qiymətli metallar, eləcə də bahalı metallarla örtülmüş adi metallar, onlardan hazırlanmış məmulatlar, bijüteriyalar, sikkələr (0,41 faiz), polimer materiallar və onlardan hazırlanmış məmulatlar (0,37 faiz), şəkər və qənandı məmulatları (0,14 faiz) ixrac olunub.
Uzaq xarici ölkələrlə idxal-ixrac əməliyyatları zamanı 13,67 milyard dollar məbləğində müsbət saldo yaranıb.