Azərbaycan, Bakı, 18 fevral /Trend, müxbir N.İsmayılova/
İqtisadi məsələlər üzrə İsveçrə Dövlət Katibliyi (SECO) Azərbaycanda kapital bazarının inkişafı layihəsi çərçivəsində iki komponenti maliyyələşdirir. Bu barədə cümə axşamı İsveçrənin Cənubi Qafqaz üzrə əməkdaşlıq ofisinin milli proqramının rəhbəri Nailə Səfərova bildirib.
"SECO vəsaitləri hesabına qanunvericilik bazasının təkmilləşdirilməsi və bazarda təkliflərin stimullaşdırılmasının yeni maliyyə alətlərinin işlənməsi üzrə tədbirlər maliyyələşdiriləcək", - Səfərova deyib.
Onun sözlərinə görə, SECO layihəsi çərçivəsində iki milyon dollara yaxın məbləğdə texniki yardımın göstərilməsi planlaşdırılır.
Dünya Bankı Azərbaycanda kapital bazarının inkişafına təxminən 10 milyon dollar vəsaitin ayrılması imkanlarını nəzərdən keçirir. Layihənin ümumi dəyəri 12-13 milyon dollara yaxındır. Bu layihənin maliyyələşdirilməsi məqsədilə 2011-ci il maliyyə ilində Beynəlxalq İnkişaf Assosiasiyasının (DB qrupuna daxildir) Azərbaycan üçün 73 milyon dollar məbləğində müəyyən edilən kvotasından güzəştli kredit verilməsi mümkündür.