Azərbaycan, Bakı, 23 fevral /Trend, müxbir Ü.İsmayılova/
Azərbaycan Əmək və Əhalinin Sosial Müdafiəsi Nazirliyi yanında Əmək Müfəttişliyi istehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsinə görə icbari sığortanın tətbiqinə əməl olunması üzrə monitorinqləri davam etdirir. Bu barədə çərşənbə günü Trend-ə müfəttişlik rəhbərinin müavini Məhərrəm Məhərov bildirib.
Monitorinqlər fevralın 1-dən başlayıb.
"Müfəttişlər hər gün beş-on istehsalat obyektində əməkdaşların icbari sığortası üzrə müqavilələrinin olub-olmamasının monitorinqini aparırlar", - Məhərov qeyd edib.
Onun sözlərinə görə, müfəttişliyin regional nümayəndəliklərinin əməkdaşları da istehsalat obyektlərində anoloji sayda monitorinqlər keçirirlər.
Məhərov bildirib ki, istehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsinə görə icbari sığortaya dair müqavilənin olmaması aşkarlanan zaman bu müəssisələr haqqında məlumatlar sığortanın bu növü üzrə xidmətlərin göstərilməsi ilə məşğul olan sığorta şirkətlərinə ötürülür.
"Monitorinqlərin ilkin yekunlarına əsasən, hazırda monitorinqlərin aparıldığı müəssisələrin çox hissəsi hələ də öz əməkdaşlarını sığortalamayıblar", - o qeyd edib.
Məhərovun əvvəllər dediyinə görə, Azərbaycanda sığorta xidmətlərinin bu növünün tətbiqi ilə texniki təhlükəsizlik qaydalarının tətbiqi barədə tələblərin yer aldığı sığorta müqaviləsinə görə istehsalatda bədbəxt hadisələrin sayı xeyli azalacaq.
2010-cu ildə Azərbaycanda istehsalatda 31-i tikinti sektorunda olmaqla 69 nəfər həlak olub. Ölkədə istehsalatda bədbəxt hadisələrin sayının azalması müşahidə olunur ki, bu da həm tikinti həcmlərinin azalması, həm də Əmək Müfəttişliyi tərəfindən görülən tədbirlərlə bağlıdır.
2007-ci ildə Azərbaycanda 259 bədbəxt hadisəyə, 128 ölüm faktına, 202 müxtəlif növ xəsarət alma hallarına təsadüf edilib. 2008-ci ildə 255 bədbəxt hadisə, 79 ölüm faktı və 212 zədə alma, 2009-cu ildə isə 250 bədbəxt hadisə, 69 ölüm hadisəsi və 218 zədə alma faktı qeydə alınıb.
Ümumdünya Əmək Təşkilatının məlumatına görə, hər il dünyada istehsalatda baş verən bədbəxt hadisələr nəticəsində 2,3 milyon insan həlak olur, bu rəqəmdən üç dəfə çox şəxs isə müxtəlif növ zədələr alır.
2010-cu ilin iyulunda Azərbaycan Prezidenti İlham Əliyev "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanunu təsdiq edib.
Hazırda ölkədə bu növ sığorta xidmətinin göstərilməsinə lisenziyası olan üç şirkət var. Bunlar "Atəşgah Sığorta", "Qala Həyat" və "Paşa Həyat" şirkətləridir.
