Azərbaycan, Bakı, 1 mart /Trend, müxbir Ü.İsmayılova/
Azərbaycanda ən iri ərzaq məhsulları istehsalçısı olan "Azərsun Holding" şirkətlər qrupu dünyada ərzaq mallarının qiymətlərinin bahalaşması fonunda öz şəxsi ehtiyatları hesabına qiymət artımının qarşısını almağa çalışır. Bu barədə bazar ertəsi "Azərsun Holding"in İctimaiyyətlə əlaqələr və sosial xidmətlər departamentinin rəhbəri Afiq Səfərov bildirib.
"Hazırda dünya bazarında ərzaq mallarının qiymətlərində xeyli artım müşahidə olunur, bunun əsas səbəblərindən biri dünya bazarında neftin qiymətinin artmasıdır", - Səfərov bildirib.
Onun sözlərinə görə, dünya birjalarında qiymət artımları ilə əlaqədar demək olar "fövqəladə" vəziyyətin yaranmasına baxmayaraq, Azərbaycan istehlak malları üzrə qiymətlərin minimum artımının baş verdiyi ölkədir.
Buna parlaq nümunə kimi onu göstərmək olar ki, hazırda dünya bazarında şəkər çuğundurunun qiyməti bir neçə dəfə bahalaşsa da , "Azərsun Holding" ölkədə yeganə şəkər çuğunduru istehsalçısı kimi yaratdığı ehtiyatlar hesabına altı ay ərzində qiymətlərin qalxmamasına nail ola bilib. Lakin bu ehtiyatlar artıq tükənib və şirkət sadəcə olaraq şəkər istehsalı üçün xammalın alınması zamanı əlavə xərclərlə bağlı məhsulun maya dəyərinə əlavələr etməyə məcburdur.
"Şəkər çuğundurunun daxili istehsalı daxili tələbatın 8-9 fazi ödənilməsi üçün şərait yaradır, çünki ölkədə illik maksimum 200-250 min ton şəkər çuğunduru istehsal olunur ki, onun yalnız 9-13 faizi şəkər tozunun istehsalı üçün yararlıdır. Bu da öz növbəsində rentabelli deyil", - Səfərov bildirib.
Onun fikrincə, bu gün daxili istehsal hesabına ölkənin şəkər çuğunduruna olan daxili tələbatını ödəmək mümkün deyil.
Onun sözlərinə görə, qiymətlərin qeyri-real olaraq sürətlə artımı, hətta əsas etibarilə təbii fəlakətlərlə bağlı ərzaq məhsullarının qıtlığı barədə SOS siqnalı artıq verilib.
"Buna baxmayaraq şirkətimiz daxili bazarın ərzaq məhsullarına olan tələbatını təmin edə bildi", - Səfərov bildirib.
Bununla yanaşı, "Azərsun Holding" şirkəti ərzaq məhsullarının istehsalı üçün külli miqdarda xammal alır. Bunun nəticəsində məhsulun maya dəyərinə əlavə vəsait lazım gəlir ki, bu da sonda ərzaq məhsullarının qiymətlərinin bahalaşmasına gətirib çıxarır.
1991-ci ildə yaradılan "Azərsun Holding" bu gün ölkədə ərzaq məhsulları istehsalı, ticarət və kənd təsərrüfatı sahəsində liderlik edən şirkətdir.
