Azərbaycan, Bakı, 14 mart /Trend, müxbir H.Vəliyev/
Yanvar-fevralda Azərbaycanın metallurgiya sənayesi və hazır metal məmulatlarının istehsalı müəssisələri tərəfindən 41,8 milyon manat məbləğində məhsul istehsal edilib və xidmət göstərilib. Bu barədə bazar ertəsi Dövlət Statistika Komitəsinin məlumatında deyilir.
Yanvar-fevralda metallurgiya sənayesində istehsalın həcmi 68,7 faiz artıb, hazır metal məmulatlarının istehsal həcmi isə 26 faiz azalıb.
İki ayın yekunları üzrə 40,1 min ton tökmə polad istehsal edilib ki, bu da 2010-cu ilin analoji dövrünün göstəricisindən iki dəfə çoxdur.
Armatur istehsalının həcmi 36 min ton təşkil edib ki, bu da 2010-cu ilin analoji dövr göstəricisindən 64,2 faiz çoxdur.
Qara metallardan hazırlanan naqil və kanatların istehsal həcmi 45,3 ton təşkil edib. Bu, 2010-cu ilin analoji dövrünün göstəricisindən 34,1 dəfə azdır.
Tökmə çuqun istehsalı 2010-cu ilin analoji dövrünə nisbətən 69,1 faiz azalaraq həcmi 35,7 ton olub.
Polad boru 12,2 min ton həcmində istehsal edilib ki, bu da 2010-cu ilin analoji dövrünün göstəricisindən 20,3 faiz çoxdur.
Qara metallardan hazırlanan yarımfabrikatların ixrac həcmi 2011-ci ilin yanvar ayının yekunlarına əsasən 3,8 min tonu ötüb (2.25 milyon dollardan artıq məbləğdə) ki, bu da 2010-cu ilin müvafiq dövr göstəricisindən 87,3 dəfə çoxdur (pula çevirdikdə təxminən 204,8 dəfə).
Yanvarda qara metallardan hazırlanan günyə və şvellerlərin ixrac həcmi 594 min ton (249,5 min dollar məbləğində ) təşkil edib. Bu, 2010-cu ilin müvafiq dövr göstəricisindən 63,1 faiz (67 faiz az məbləğdə) azdır.
Yanvarda qara metallardan hazırlanan boruların ixracı 5,7 min tona yaxın olub ki (4,9 milyon dollardan yuxarı məbləğdə), bu da 2010-cu ilin müvafiq dövr göstəricisindən 12,7 dəfə çoxdur.
