...

İkinci rübdə Azərbaycanda layihələrin güzəştli maliyyələşdirilməsinə 40 milyon manat yönəldiləcək

Biznes və iqtisadiyyat xəbərləri Materials 11 Aprel 2011 16:59 (UTC +04:00)

Azərbaycan, Bakı, 11 aprel /Trend, müxbir N.İsmayılova/

Azərbaycan İqtisadi İnkişaf Nazirliyi yanında Sahibkarlığa Kömək Milli Fondu (SKMF) cari ilin ikinci rübündə layihələrin maliyyələşdirilməsinə 40 milyon manata yaxın vəsait yönəltməyi planlaşdırır. Trend-in məlumatına görə, bu barədə fondun icraçı direktoru Şirzad Abdullayev deyib.

"İkinci rübdə biz bəyənilən layihələrə, eləcə də artıq maliyyələşdirilən layihələrə 40 milyon manat yönəltməyi planlaşdırırıq. Hazırda fonda daxil olan layihələrin ekspertizası davam etdirilir", - Abdullayev vurğulayıb.

Onun sözlərinə görə, birinci rübdə 332 layihə maliyyələşdirilib. Bu, ötən ilin yekunları üzrə analoji göstəricini 70 faiz üstələyir. Bu layihələr üzrə ümumi məbləğ ötən ilin analoji dövründəki 19 milyon manata nisbətdə 27,5 milyon manat təşkil edib. İlin əvvəlindən maliyyələşdirilən layihələrdən 25-i (soyuducu-anbar komplekslərinin, bitki yağlarının istehsalı zavodunun, karton və kağız emalı zavodunun tikintisi üzrə) iri layihədir.

Kartof və soğanın becərildiyi Bərdə, Ağcabədi, Tərtər, Füzuli, Gədəbəy kimi rayonlarda fond soyuducu-anbar komplekslərinin tikintisini maliyyələşdirir və bu istiqamətdə fəaliyyət gələcəkdə də davam etdiriləcək.

"Biz ölkədə kartofun yeni məhsuldar növlərinin tətbiqini də hədəf seçmişik. Bu məqsədlə Baltikyanı ölkələrdən sınaq qaydasında bir neçə rayonda əkiləcək şitillər gətirilib. Müsbət nəticə əldə edilərsə, gələn il bu növlər geniş tətbiq olunacaq", - Abdullayev əlavə edib.

Onun sözlərinə görə, Milli Fond üzümçülük sahəsində də fəaliyyəti aktivləşdirib. Bununla əlaqədar aprelin 15-də Tovuzda yerli sahibkarların iştirakı ilə tədbir keçiriləcək. Bu istiqamətdə bir sıra layihələr artıq fonda təqdim edilib və SKMF onların maliyyələşdirilməsi məsələsinə baxır.

Aprelin 11-nə olan rəsmi məzənnə 0,7923 AZN/USD təşkil edir.

Xəbər lenti

Xəbər lenti