Azərbaycan, Bakı, 11 may /Trend, müxbir N.İsmayılova/
Dünya Bankının (DB) Azərbaycanın maliyyə sektorunda fəaliyyət istiqamətlərinin müzakirəsi üçün maliyyə proqramının rəhbəri və DB-nin Cənubi Qafqazda maliyyə məsələləri üzrə əlaqələndiricisi Maykl Edvardsın başçılıq etdiyi nümayəndə heyətinin mayın 26-da ölkəyə səfəri başlayır. Bu barədə çərşənbə günü Trend-ə bankın Bakı nümayəndəliyindən deyiblər.
Missiya ölkədə iyunun 15-dək qalacaq.
Səfər zamanı DB-nin istehlakçıların hüquqlarının qorunması sahəsində texniki yardımı çərçivəsində məsləhətləşmələr aparılacaq. Kapital bazarının modernləşdirilməsi layihəsinin (CMMP) həyata keçirilməsinə hazırlıq da aparılacaq. Layihənin həyata keçirilməsinə bank 12 milyon dollar ayırıb. Bu layihə Dünya Bankının Azərbaycan hökumətinin maliyyə sektorunun möhkəmləndirilməsi və şaxələndirilməsində göstərdiyi dəstəyin davamıdır.
Layihə ortamüddətli perspektivdə özəl sektora davamlı alternativ maliyyə mənbələri üçün imkanların təmin edilməsi yolu ilə dəstəyin artırılmasını nəzərdə tutur ki, bu da Dünya Bankının 2011-2014-cü illərdə ölkə ilə qeyri-neft sektorunun gücləndirilməsi strategiyası çərçivəsində birinci strateji tapşırığın icrasına kömək edəcək.
İsveçrənin İqtisadi Məsələlər üzrə Dövlət Katibliyi (SECO) də bu layihənin komponentlərindən birini maliyyələşdirəcək. Kapital bazarının oyunçularının potensialının möhkəmləndirilməsinə və bu layihə çərçivəsində bazar alətlərinin inkişafına SECO 1,7 milyon dollar məbləğdə texniki yardım göstərməyi planlaşdırır.
