...

Azərbaycanda daşınmaz əmlakın icbari sığortasının tətbiqi çərçivəsində qiymətləndiricilərə qarşı tələblər sərtləşdiriləcək

Biznes və iqtisadiyyat xəbərləri Materials 2 İyun 2011 17:40 (UTC +04:00)

Azərbaycan, Bakı, 2 iyun /Trend, müxbir A.Axundov/

Müzakirəsi iyunun sonunda üçüncü oxunuşda gözlənilən "Sığortanın icbari növləri haqqında" qanun layihəsində daşınmaz əmlak qiymətləndiricilərinə qarşı tələblərin sərtləşdirilməsi təklif edilir. Bu barədə Trend-ə cümə axşamı parlamentin İqtisadi siyasət komitəsinin sədri Ziyad Səmədzadə deyib.

"Qanun layihəsində, xüsusilə də daşınmaz əmlak maddəsi üzrə ciddi dəyişikliklər gözlənilir. Mühüm məsələ sığortaya verilən əmlakın real ekspert qiymətləndirməsidir", - Səmədzadə bildirib.

Onun sözlərinə görə, Azərbaycanda müasir qiymətləndiricilər və bu sahədə müvafiq təcrübə yoxdur.

"Dünyada əmlakın qiymətləndirilməsi üzrə müasir metodologiya, müvafiq normativlər var. Onlar qiymətləndirilən zaman 2-3 faizlik yanlışlıq yarana bilər. Azərbaycanda isə bir bina bir neçə ekspert tərəfindən qiymətləndirilə bilər, onların qiymətləndirmələri isə bir-birindən çox fərqlənir", - Səmədzadə qeyd edib.

Səmədzadənin sözlərinə görə, buna görə də "Sığortanın icbari növləri haqqında" qanun layihəsində qiymətləndiricilərə qarşı sərt tələblər irəli sürüləcək. Onlardan biri qiymətləndirmə fəaliyyətini həyata keçirmək üçün sertifikatın alınması olacaq.

"Sertifikatları Əmlak Məsələləri Dövlət Komitəsi, yaxud özəl şirkətlər verəcək. Xaricidə bununla özəl şirkətlər məşğul olur", - Səmədzadə əlavə edib.

"Sığortanın icbari növləri haqqında" qanun layihəsi ikinci oxunuşda qəbul edilib və indi o, təkliflər nəzərə alınmaqla xüsusi komissiya tərəfindən tamamlanır.

Yeni qanun layihəsi icbari sığortanın dörd növünü - daşınmaz əmlakın, avtonəqliyyat vasitələri sahiblərinin məsuliyyətinin, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir.

Qanun layihəsinə əsasən, mənzilin qiymətindən asılı olmayaraq, Bakı üçün 25 min manat səviyyəsində məbləğin tətbiq edilməsi barədə qərar qəbul edilib, azadolma məbləği isə 250 manat səviyyəsində müəyyənləşdirilib. Sumqayıt, Gəncə və Naxçıvan şəhərləri üçün 200 manat azadolma məbləği ilə sığorta məbləği 20 min manat, qalan regionlar üçün 15 min manat (150 manat) səviyyəsində təşkil edir.

Sığortanın bu növü üzrə 0,2 faizlik sığorta tarifi ilə paytaxt sakinləri üçün sığorta haqqı 50 manat təşkil edəcək, sığorta ödənişinin böyük məbləğinə ümid edənlər isə əmlakın könüllü sığorta polisini almaq imkanını əldə edirlər, bu isə sığortanın bu istiqamətinin də inkişafına imkan verəcək.

Qanun layihəsinə əsasən, daşınmaz əmlakın icbari sığortası fiziki şəxslərə məxsus bütün növ tikililərə, yaşayış evlərinə, hüquqi şəxslərin ofislərinə, dövlət əmlakına aid olacaq. Bununla yanaşı, sığorta faktları bu əmlaka yanğın, partlayış, tufan, elektrik şəbəkəsində qısaqapanma, kanalizasiya və ya su kəməri sistemində qəzalar, təbii kataklizmlər və s. nəticəsində dəyən ziyanlar hesab ediləcək.

Daşınmaz əmlakın istismarı ilə bağlı vətəndaş məsuliyyətinin icbari sığortası üçüncü şəxslərin bu əmlakdan istifadə zamanı dəyən ziyandan sığorta müdafiəsini nəzərdə tutur. Sığortanın bu növü sahibkarlıq fəaliyyəti ilə məşğul olan hüquqi və fiziki şəxslərə aid olacaq. Sığortanın bu növü üzrə sağlamlığa dəyən ziyan zamanı ödənişin məbləği 50 min manat (bir nəfər üçün 5 min manat), əmlak üçün 50 min manat təşkil edəcək.

Sərnişinlərin icbari sığortası növündən asılı olmayaraq nəqliyyatdan istifadə edən şəxslərə şamil ediləcək. Bu halda sığorta ödənişinin məbləği bir nəfər üçün 5 min manat təşkil edəcək. İndiyədək sığortanın bu növü 2003-cü ildə qəbul edilən qanunla tənzimlənib. Lakin hazırda onun forması qəbuledilməzdir və təzminat alarkən problemlər yaradır.

Qanun layihəsi avtonəqliyyat vasitəsindən asılı olaraq sığorta tarifinin müəyyənləşdirilməsi zamanı şaxələndirilmiş yanaşmanı nəzərdə tutur. Əmlak üzrə avtonəqliyyat vasitələri sahiblərinin məsuliyyətinin ödəniş məbləği 5 min manat (hazırda 1 min manat), sağlamlıq üzrə 50 min manat (hazırda 5 min manat) təşkil edəcək. Fəaliyyətin bu növü 1996-cı ilin qanunu ilə tənzimlənir.

Xəbər lenti

Xəbər lenti