Azərbaycan, Bakı, 10 iyun /Trend, müxbir A.Axundov/
Azərbaycanın sığorta bazarında bir neçə kiçik sığortaçının bir iri şirkətdə toplaşması və ya birləşməsi üçün zəmin var. Bunun üçün kifayət qədər səbəb var. Azərbaycan Sığortaçılar Assosiasiyasının (ASA) icraçı direktoru Azər Əliyev bu fikirdədir.
"Bu ən azı onlara ona görə lazımdır ki, şirkətin kapitallaşdırılmasını, kadr potensialını artıra, öz portfellərinin maliyyə nəticələrini yaxşılaşdırmaq üçün müştəri bazasını birləşdirə bilsinlər. Gördüyünüz kimi, birləşmək üçün səbəb kifayət qədərdir", - Əliyev qeyd edib.
Azərbaycanın sığorta şirkəti "Paşa Sığorta"nın idarə heyətinin sədri Nofəl Rzayevin sözlərinə görə, həm nizamnamə, həm də məcmu kapitalın kapitallaşdırılmasının artırılması bazarın gələcək peşəkarlığı üçün ciddi addımdır. Və bu məsələdə Qazaxıstan və Rusiya kimi qonşu ölkələrin bazarlarına diqqət yetirmək lazımdır, çünki normal sığorta tərəfdaşının bir evin dəyəri məbləğində kapitalı ola bilməz.
Hazırda Azərbaycanda ən çox kapitallaşdırılan şirkətlər 30 milyon manat kapitalla "Paşa Sığorta" və 21,06 milyon manatla "Xalq Sığorta" şirkətləridir.
Rzayev hesab edir ki, yerli şirkətlər sığorta bazarının inkişaf etdiyi MDB ölkələrinə diqqət yetirməlidirlər, çünki Azərbaycan regionda liderliyə iddialıdır. "Buna görə də biz özümüzü Ermənistan və Gürcüstanla deyil, Qazaxıstan, Ukrayna, Rusiya ilə müqayisə etməliyik. Bu ölkələrin TOP 10-luğuna daxil olanların artıq 50-60 milyon dollar səviyyəsində kapitalı var", - Rzayev qeyd edib.
Onun fikrincə, Azərbaycanda zəif sığorta şirkətləri üçün ideal həll birləşməkdir. AXA [2010-cu ildə Azərbaycanın sığorta bazarına çıxıb], AIG, Groupama və digərləri ilə sığorta biznesini peşəkar səviyyədə aparmaq üçün çox ciddi maddi-texniki bazaya malik olmaq lazımdır.
"Məcmu kapitalı 1-2 milyon manat məbləğində olan şirkətlər demək olar ki, bu imkandan məhrumdurlar. Belə şirkətlər üçün ən ideal həll birləşməkdir. Bu halda onların kapitalı 3-4 milyon manatadək artacaq. Bank bazarında da zəif bankların birləşməsi elə bu şəkildə gedib, bu proses sığorta bazarında da baş verə bilər", - Rzayev qeyd edib.
Bəzi bazar iştirakçılarının fikrincə, 2011-ci ildə Azərbaycanın sığorta bazarında kapitalın normativ səviyyəyə çatdırılması çətinlikləri ilə bağlı bir sıra sığorta şirkətləri bağlana bilər.
Hazırda ölkədə fəaliyyət göstərən 28 sığorta şirkətindən yalnız 4-ü ilin əvvəlinə görə kapitallaşdırma qrafikindən geridə qalır.
Ekspertlər zəif şirkətlərin getməsini qaçılmaz sayırlar. Bazarda "nəhənglər" qalacaq. Onlar rəqabət məqsədilə xarici investorları cəlb etməyə məcbur olacaqlar, bu isə Azərbaycanın sığorta bazarının inkişafına yeni impuls verəcək. Ekspertin fikrincə, bu yolla xarici səhmdarları hamıdan birinci cəlb edən "Bank Respublika" və "Unibank" gedib.
2008-ci ildə Azərbaycanda sığorta və təkrar sığorta şirkətlərinin ümumi nizamnamə kapitalı 23,2 faiz artaraq 79,8 milyon manata çatıb, 2009-cu ildə isə 8 faiz artaraq 89,8 milyon manat təşkil etmişdi. 2010-cu ilin yekunları üzrə sığorta şirkətlərinin kapitalı 2009-cu ilin göstəricisinə nisbətdə 46 faiz artaraq 153,6 milyon manata çatıb.
İyunun 10-na olan rəsmi məzənnə 0,7884 AZN/USD təşkil edir.
