Azərbaycan, Bakı, 14 iyun /Trend/
Cari ilin yanvar-aprelində Azərbaycana 16,2 min minik avtomobili idxal olunub ki, bu da ötən ilin analoji dövr göstəricisindən 14 faiz çoxdur. Bu barədə çərşənbə axşamı Trend-ə Dövlət Statistika Komitəsindən məlumat verilib.
Məlumata görə, gətirilən minik avtomobillərinin ümumi dəyəri 155 milyon dollara yaxındır. Bu, 2010-cu ilin yanvar-aprel ayları ilə müqayisədə 31,9 faiz çoxdur.
Yanvar-apreldə Azərbaycana 1461 ədəd yük avtomobili idxal olunub ki, bu da 2010-cu ilin analoji dövr göstəricisindən 5,6 faiz çoxdur. Gətirilən avtomobillərin ümumi dəyəri 26,74 milyon dollara yaxın təşkil edib ki, bu da 2010-cu ilin analoji dövr göstəricisi ilə müqayisədə 7,2 faiz aşağıdır.
Həmçinin, yanvar-apreldə respublikaya 212 ədəd avtobus idxal olunub ki, bu da 2010-cu ilin yanvar-aprelindəki göstəricindən 26,9 faiz azdır. Bu dövrdə idxal olunan avtobusların məbləği 9,84 milyon dollar təşkil edib ki, bu da ötən ilin analoji dövründə qeydə alınan göstəricidən 34,2 faiz azdır.
Bu ilin yanvar-mayında Azərbaycanda 333 ədəd yük avtomobili istehsal olunub ki, bu göstərici ötən ilin müvafiq dövründəkindən 64,9 dəfə çoxdur. Eləcə də həmin dövrdə ölkədə 165 minik avtomobili buraxılıb ki, bu da ötən ilin eyni dövrünün göstəricisindən 8,8 faiz azdır.
