Azərbaycan, Bakı, 21 iyun /Trend, müxbir A.Axundov/
Azərbaycan Kənd Təsərrüfatı Nazirliyi ölkəyə qərbdən gələn çəyirtkənin yayılması ilə mübarizə aparır. Trend-in məlumatına görə, bu barədə çərşənbə axşamı jurnalistlərə nazirlik yanında Fitosanitar Nəzarət Xidmətinin rəhbəri Məmmədəli Dünyamalıyev deyib.
"Mərakeş çəyirtkəsi əsasən Gürcüstandan və Ermənistanın işğal etdiyi Azərbaycan ərazilərindən gəlir. Biz onun yayılması ilə mübarizə aparırıq. Məlum olduğu kimi, çəyirtkədən Rusiyanın bəzi rayonları ziyan çəkib, bizdə isə hələ ki belə təhlükə yoxdur", - Dünyamalıyev bildirib.
Onun sözlərinə görə, bu il çəyirtkənin bitkilərə vura biləcəyi ziyanın təhlükəsinin qarşısı demək olar alınıb.
"2-3 il əvvəl Azərbaycan çəyirtkələrin, əsasən Mərakeş çəyirtkəsinin, müxtəlif gəmiricilər və digər ziyanvericilərin hücumuna məruz qalmışdı. Ziyanvericilərə qarşı gördüyümüz tədbirlər nəticəsində bu il onların yayılma arealını azaltmaq mümkün olub", - Dünyamalıyev qeyd edib.