Azərbaycan, Bakı, 26 iyun /Trend, müxbir A.Axundov/
Azərbaycanda ipoteka kreditlərinin verilmə şərtlərinin sadələşdirilməsi bazarın fəallığına müsbət təsir göstərəcək. Bu barədə Trend-ə "MBA Group" konslatinq şirkətinin baş direktoru Nüsrət İbrahimov deyib.
"Hazırda ölkədə elə gənc ailələr var ki, mənzilə real ehtiyacları və ipoteka krediti götürməyə imkanları var. Lakin bu halda lazımi sənədləri yığa bilmirlər, onların müəyyən problemləri var. Şərtlər sadələşdirilsə, bazarın fəallığı artacaq", - İbrahimov qeyd edib.
Bundan əvvəl Azərbaycan Mərkəzi Bankının (AMB) idarə heyətinin sədri Elman Rüstəmovun dediyinə görə, hazırda ipoteka kreditlərinin verilməsinin sadələşdirilməsi üçün yeni strategiya hazırlanır.
"Baxılan istiqamətlərdən biri ipoteka kreditinin maksimum məbləğinin yenidən nəzərdən keçirilməsi, faiz dərəcələrinin azaldılması və ölkədə ipoteka kreditinin inkişafı üçün şəraitin yaradılmasına imkan verən tədbirlərin görülməsidir", - Rüstəmov bildirib.
Onun sözlərinə görə, araşdırmalar nəticəsində məlum olub ki, kreditin hazırkı maksimal məbləği gənc ailələrə yeni tikililərdə mənzil almağa imkan vermir, ona görə də onlar təkrar bazardakı mənzillərə üstünlük verirlər.
"İpoteka kreditinin şərtlərinə mənzil fondunun yenilənməsi məqsədilə gənclər üçün şərait yaradılması ilə əlaqədar baxılacaq", - Rüstəmov bildirib.
İbrahimovun sözlərinə görə, hazırda qüvvədə olana qaydalara əsasən, yeni tikilidə ipoteka krediti hesabına mənzil almaq üçün yerli İcra Hakimiyyətindən alınan bu yeni tikilinin tikintisinə icazəyə dair aktın surəti və müştərinin mənzili hansı qiymətə alması barədə maliyyə arayışı lazımdır.
"Tikinti şirkətindən yalnız iki sənəd tələb olunur. Hansı şərtlərin irəli sürülməsindən asılı olmayaraq, sadəcə olaraq bəzi tikinti şirkətləri ya bu sənədi verməkdə qorxurlar ya da bəzilərində bu ümumiyyətlə yoxdur. Mən təsəvvəür etmirəm ki, bu prosesi daha neə sadələşdirmək olar", - İbrahimov qeyd edib.
Bu arada, "Əmlak Bazarı İştirakçıları" İctimai Birliyinin məlumatına görə, apreldə Bakıda Xətai rayonunda yerləşən yalnız bir yeni tikili satışdan çıxarılıb. Bunun nəticəsində apreldə Bakıda satılmayan yeni tikililərin sayı 437 olub.
Araşdırmalara əsasən, alıcılar qiyməti bir kvadratmetri 500-600 manat olan yeni tikililərə üstünlük verirlər. Apreldə Bakının ilkin mənzil bazarında qiymətlər ötən aya nisbətdə dəyişməyib və 841 manat olub. İlin əvvəlinə nisbətdə qiymətlər 0,8 faiz, ötən ilin anoloji dövrünə 3,4 faiz, böhran dövrü ilə (2008-ci ilin sentyabrı) 29,6 faiz azalıb.
Hazırda AİF-in şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və illik səkkiz faizlə 25 il müddətinə verilir. Sosial ipoteka 35 min manat təşkil edir və illik dörd faizlə 30 il müddətinə verilir. Güzəştli kreditlər üçün ilkin ödəniş 15 faiz, adi kreditlər üçün 20 faiz təşkil edir.
Azərbaycan İpoteka Fondu 2005-ci ilin sentyabrında Azərbaycan Prezidentinin fərmanı ilə dövlət təşkilatı qismində yaradılıb. Onun nizamnaməsi Prezidentin ayrıca fərmanı ilə 2005-ci ilin dekabrında təsdiq edilib. AİF-in əsas məqsədi Azərbaycan vətəndaşlarının uzunmüddətli maliyyələşdirmə vasitəsilə mənzillərlə təmin edilməsi üçün maliyyələşmə mexanizmlərinin yaradılmasından, eləcə də ipoteka kreditləşməsinə daxili və xarici investisiyaların cəlb edilməsindən ibarətdir.
