Azərbaycan, Bakı, 17 avqust /Trend, müxbir N.İsmayılova/
İlin əvvəlindən İqtisadi İnkişaf Nazirliyi yanında Sahibkarlığa Kömək Milli Fondu (SKMF) Bakı qəsəbələrindən olan 145 sahibkara 23 milyon manat həcmində kredit verib. Bu barədə fondun icraçı direktoru Şirzad Abdullayev bildirib.
"Bu vəsaitlərin ümumi həcmindən 21,6 milyon manat 19 iri və böyük layihənin həyata keçirilməsinə yönəldilib ki, onların arasında beş çörək istehsalı müəssisəsi, yeddi istixana kompleksi və dörd quşçuluq təsərrüfatı, bir ət emalı və bir mebel istehsalı müəssisəsi var", - Abdullayev deyib.
126 kiçik layihənin həyata keçirilməsinə 1,4 milyon manat yönəldilib. Abdullayevin sözlərinə görə, İlham Əliyevin 2011-ci il 4 may tarixli sərəncamı ilə təsdiq edilən "2011-2013-cü illərdə Bakı və onun ətraf qəsəbələrinin sosial-iqtisadi inkişafı üzrə Dövlət Proqramı" çərçivəsində zəfəran və zeytun yetişdirilməsi və emalı müəssisələrinin, 10 quşçuluq təsərrüfatının, 15 çörək istehsalı müəssisəsinin, 10 ət emalı müəssisəsinin yaradılması kimi istiqamətlərin inkişafı nəzərdə tutulub.
"Lakin əgər sahibkarlar iqtisadi baxımdan əlverişli olan başqa təşəbbüslərlə çıxış etsələr, onda onlar da maliyyələşdiriləcəklər", - icraçı direktor deyib.
2011-ci ildə SKMF 92,1 milyon manat məbləğində 1102 kredit verib. Bu vəsaitlər dəyəri 77,4 milyon manat olan 57 iri, 14,7 milyon manat məbləğində 1045 kiçik layihənin həyata keçirilməsinə yönəldilib.
