Azərbaycan, Bakı, 26 avqust /Trend, müxbir A.Axundov/
Avqustun 22-nə olan məlumata görə, Azərbaycanda payız-yay dənli və paxlalı bitkilərin (qarğıdalı istisna olmaqla) məhsuldarlığı bir hektardan 24,7 sentner təşkil edib. Bu göstərici 2010-cu ildə bir hektardan 19,8 sentner olub ki, bu da 24,7 faizlik artım deməkdir. Trend-in məlumatına görə, bu barədə Kənd Təsərrüfatı Nazirliyinin məlumatında deyilir.
Buğdanın məhsuldarlığı bir hektardan 25,1 sentner təşkil edir. Bu, ötən ilin göstəricisini 26,1 faiz üstələyir.
Avqustun 22-nə olan məlumata görə, 930,8 min hektar sahədən (il ərzində 0,2 faiz azalma) 2,3 milyon ton taxıl məhsulu yığılıb (il ərzində 24,2 faiz artım).
Ümumilikdə 933,6 min hektar sahədən məhsulun yığılması gözlənilir. Bu, ötən ilin göstəricisindən 0,5 faiz azdır.
Hesabat dövrü ərzində 654,02 min hektar sahədən (il ərzində 0,4 faiz azalma) 1,64 milyon ton (25,5 faiz artım) buğda yığılıb. Son məlumatlara görə, səpilən buğdanın 99,97 faizi emal edilib.
Ölkədə yaz tarla işləri iyunda başa çatıb.
2011-ci ilin ilk yeddi ayı ərzində Azərbaycanda kənd təsərrüfatı məhsullarının istehsalı ötən ilin analoji dövrü ilə müqayisədə 10,2 faiz, o cümlədən bitkiçilik məhsulları 15,1 faiz, heyvandarlıq məhsulları 4,8 faiz artıb.
Bir müddət əvvəl kənd təsərrüfatı naziri İsmət Abasovun dediyi kimi, Azərbaycanda 2011-ci ildə 2,5 milyon ton taxıl istehsalı gözlənilir. Bu, ötən ilin göstəricisini 500 min ton üstələyir.
"Hava şəraiti əlverişli olsa, biz 2,5 milyon ton taxıl istehsalını proqnozlaşdırırıq. Bunun 1,7 milyonu buğdanın payına düşəcək", - Abasov qeyd edib.
2011-ci ildə 800 min ton arpa istehsalı planlaşdırılır.
Ötən il ərzində ölkədə 2000,9 min ton taxıl yğılıb. Bu, 2009-cu ildəkindən 33 faiz azdır. Hər hektardan orta hesabla 20,7 sentner taxıl yığılıb.
Nazirin sözlərinə görə, bu gün ölkənin taxıla olan tələbatı 3-3,2 milyon ton təşkil edir.
