Azərbaycan, Bakı, 7 sentyabr /Trend, müxbir A.Axundov/
"Azərbaycan Hava Yolları" QSC Uzaq Şərqə, xüsusilə Çin, Tayland və Sinqapura reyslərin açılmasının mümkünlüyünü öyrənir. Bu barədə Trend-ə çərşənbə günü "Silk Way Travel"-in direktoru Şirzad Əfəndiyev deyib.
"Bu istiqamətlərdə reyslərin açılmasının məqsədəuyğunluğunu öyrənirik", - Əfəndiyev deyib.
Onun sözlərinə görə, həmin istiqamətlərdən birində reyslərin açılması artıq bu il baş tuta bilər.
"Bu yaxınlarda biz Aberdin, Praqa, İzmir və Simferopola yeni reyslər açmışıq və yeni təyyarələrin gəlməsi ilə reyslərin sayı artacaq", - Əfəndiyev vurğulayıb.
O, bildirib ki, şirkət Amsterdama reys açılmasını qeyri-müəyyən vaxta təxirə salıb, amma tamamilə planlardan çıxarılmayıb, çünki hazırkı tədqiqatlar bu reysin iqtisadi cəhətdən xeyirli olmadığını göstərir.
Əfəndiyev ABŞ-a birbaşa reysin açılması ilə bağlı bildirib ki, hazırda AZAL-ın bir Boeing 767 tipli təyyarəsi var və bu say çox azdır. Buna görə, həmin reysin açılması gələn il ikinci belə təyyarənin alınması və ya 2014-cü ildə Boeing Dreamliner 787 təyyarəsini almaqla mümkün ola bilər.
