Azərbaycan, Bakı, 7 sentyabr /Trend, müxbir A.Axundov/
Azərbaycanda mülki təyyarə pilotları üçün kursların təşkili gözlənilir. Trend-in məlumatına görə, bunu çərşənbə günü "Silk Way Travel" şirkətinin direktoru Şirzad Əfəndiyev jurnalistlərə bildirib.
"Milli Aviasiya Akademiyası nəzdində mülki təyyarə pilotları üçün kursların açılması gözlənilir, burada müvafiq lisenziyalar veriləcək. Bu gün kiçikhəcmli təyyarələrdən Azərbaycanda akademiyanın kursantları üçün təlim məqsədilə istifadə olunur, lakin gələcəkdə bu istiqamət də inkişaf edəcək", - o bildirib.
Onun sözlərinə görə, akademiyanın təlim mərkəzində "Azərbaycan Hava Yolları"nın istifadə etdiyi bütün təyyarələrin simulyatorları mövcuddur.
O deyib ki, bu simulyatorlarda təlim keçmək üçün yalnız Azərbaycandan deyil, eləcə də xarici ölkələrdən müraciətlər daxil olur.
Əfəndiyev qeyd edib ki, "Silk Way Business Aviation" şirkətinin Gulfstream, ATR və Boeing 727 tipli biznes təyyarələri var.
"Bunlar 8, 12, 14, 19 və 60 yerlik təyyarələrdir. Hər bir vətəndaş və ya şirkət bu təyyarələri sifariş edib müəyyən istiqamətdə uça bilər. Bu yaxınlarda şirkətin Bakıdakı hava limanı yaxınlığında ayrıca bir terminalı açılıb", - o deyib.
Onun sözlərinə görə, Azərbaycanda biznes aviasiyanın inkişaf etməsi ilə köhnələrinin yenidən qurulması və kiçikhəcmli hava limanlarının tikilməsinə ehtiyac yaranacaq.
Əfəndiyev bildirib ki, Azərbaycanın regionlarında hazırda dörd beynəlxalq hava limanı işləyir, yaxın vaxtlarda daha bir aeroport Qəbələdə istifadəyə veriləcək. "Hesab edirəm ki, hazırkı limanların sayı Azərbaycan üçün kifayətdir, lakin biznes aviasiyası inkişaf etsə, onda kiçikhəcmli limanların sayının artırılması zəruri olacaq", - o deyib.
