Azərbaycan, Bakı, 12 sentyabr /Trend, müxbir A.Axundov/
Azərbaycan Dövlət Gömrük Komitəsinin rəhbəri Aydın Əliyev Azərbaycanla Almaniya arasında aparılan mal dövriyyəsi üzrə statistik məlumatların fərqli olmasının səbəblərini izah edib.
"Əvvəla, müxtəlif ölkələrin məlumatları heç də həmişə üst-üstə düşmür. Bununla yanaşı, Heydər Əliyev Beynəlxalq Hava Limanında Almaniyadan gətirilmiş, lakin hələ də gömrük sənədləşdirməsindən keçməyən, yükünün ümumi məbləği 231 milyon dollar olan altı avialayner var", - Əliyev bazar ertəsi jurnalistlərə bildirib.
Bundan əvvəl Almaniyanın Azərbaycandakı səfiri Herbert Kvelle rəqəmlərin 400 milyon dollar fərqləndiyini bildirmişdi.
DGK-nın məlumatına görə, ilin yeddi ayı ərzində iki ölkə arasında mal dövriyyəsi 416,117 milyon dollar olub ki, bu da Azərbaycanın ümumi xarici ticarətinin 2 faizini təşkil edir.