Azərbaycan, Bakı, 30 sentyabr /Trend, müxbir A.Axundov/
Azərbaycan Sığortaçılar Assosiasiyası (ASA) üzvlük haqları üçün fərqləndirici ölçülər təyin edə bilər. Trend-in məlumatına görə, bunu cümə günü jurnalistlərə ASA-nın icraçı direktoru Azər Əliyev deyib.
"İlin sonunadək üzvlük haqlarının artırılması məsələsinin də nəzərə alınacağı ASA-nın yeni nizamnaməsi qəbul olunacaq. Amma indi dəqiq demək olmur ki, bu artım hamıya aid olacaq, yoxsa şirkətin ASA-nın fəaliyyətinə olan marağından asılı olaraq fərqləndiriləcək. Beynəlxalq sığorta forumu, bazarın müxtəlif araşdırmaları və digərləri kimi tədbirlərin keçirilməsi üçün əlavə xərclər gərəkdir. Üzvlük haqlarının artırılması bu məsələdə maraqlı olan şirkətlərə şamil edilə bilər", - o deyib.
Hazırda üzvlük haqqı bütün şirkətlər üçün eynidir və 5 min manat təşkil edir.
Onun sözlərinə görə, indi Hüquq komitəsi nizamnamə üzərində iş aparır.
"Oktyabrın ortalarına kimi nizamnamənin layihəsi hazır olmalıdır, biz onu bütün şirkətlərə göndərəcəyik. Bizə əlavə bir ay vaxt lazımdır ki, onlardan şərhləri alaq və daha bir aylıq müddət də onun təsdiqlənməsi üçün lazımdır. İlin sonunadək nizamnamə qəbul olunacaq", - Əliyev deyib.
Azərbaycanda 28 sığorta və bir təkrar sığorta şirkəti var. Onların hamısı ASA-nın üzvüdür. "Fidan Sığorta" şirkətinin lisenziyası müvəqqəti olaraq dayandırılıb.
Sentyabrın 30-na olan rəsmi məzənnə 0,7869 AZN/USD təşkil edir.
