Azərbaycan, Bakı, 18 oktyabr /Trend, müxbir S.Ağayeva/
Serbiya Azərbaycanla iqtisadi münasibətləri inkişaf etdirmək niyyətindədir. Trend-in məlumatına görə, bu barədə çərşənbə axşamı Serbiyanın Azərbaycandakı səfiri Zoran Vayoviç bildirib.
"Ölkələr arasında əməkdaşlığın perspektivləri noyabrın 3-4-də Belqradda Ticari-iqtisadi əməkdaşlıq üzrə hökumətlərarası komissiyanın ilk iclası və biznes-forum çərçivəsində müzakirə olunacaq", - Vayoviç deyib.
Diplomat qeyd edib ki, belə razılaşma Serbiyanın xarici işlər naziri, hökumətlərarası komissiyanın həmsədri olan Vuka Yeremiçin avqustda Azərbaycana səfəri zamanı əldə olunub.
Səfir bu tədbirlər çərçivəsində ticari-iqtisadi əməkdaşlıq haqqında sazişin və biznesin inkişafında maraqlı olan özəl sahibkarlar arasında bir sıra müqavilələrin imzalanacağına ümidini ifadə edib.
"Serbiya Azərbaycanın investisiyalarının cəlb olunmasında maraqlıdır və Azərbaycan tərəfi də Serbiyanın infrastruktur layihələrində iştiraka maraq göstərir. Azərbaycan-Serbiya hökumətlərarası komissiyasının ilk iclasının iqtisadi əməkdaşlığın gələcək möhkəmləndirilməsi üçün mühüm addım olacağını hesab edirəm", - Vayoviç deyib.
Belqrada səfər zamanı Azərbaycanın hökumət nümayəndə heyətinə iqtisadi inkişaf naziri, hökumətlərarası komissiyanın həmsədri Şahin Mustafayev başçılıq edəcək.
Səfir bildirib ki, Serbiyada keçiriləcək biznes-forumda Azərbaycanın 50-yə yaxın şirkətinin nümayəndələrinin iştirakı gözlənilir.
2011-ci il yanvar-sentyabr aylarının yekunları üzrə Azərbaycanla-Serbiya arasında xarici ticarət dövriyyəsi 1,41 milyon dollar təşkil edib və ötən ilin analoji dövrü ilə müqayisədə 18,5 faiz artıb. Mal dövriyyəsinin 99 faizindən çoxu Serbiyadan mal idxalının payına düşür.
