Azərbaycan, Bakı, 21 noyabr /Trend, müxbir E.İsmayılov/
2014-cü ilin sonuna qədər "Azərbaycan Dəmir Yolları" QSC Bakı-Böyük Kəsik marşrutu üzrə qataraların hərəkət sürətini saatda 140 kilometrə çatdırmağı planlaşdırır. Trend-in məlumatına görə, bu barədə bazar ertəsi jurnalistlərə QSC-nin rəhbəri Arif Əsgərov deyib.
2010-cu il iyulun 6-da Azərbaycan Prezidenti İlham Əliyevin təsdiq etdiyi "Azərbaycanda dəmir yolu nəqliyyat sisteminin 2010-2014-cü illərdə inkişafına dair Dövlət Proqramı"nın həyata keçirilməsi məqsədilə və Azərbaycan hökuməti və Dünya Bankının maliyyələşdirdiyi dəmiryol üzrə ticarətə dəstək layihəsi çərçivəsində Çexiyanın "Exim Bank"ı ilə 215 milyon avro dəyərində kredit sazişi imzalanıb.
Bu vəsaitlər hesabına Bakı-Böyük Kəsik istiqamətində 317 kilometr yolun əsaslı təmiri həyata keçirilir. Bu işlər 2011-ci ilin iyunun 10-da Ağstafa-Tatlı sahəsinin 97-ci kilometrindən start götürüb.
Əsgərovun sözlərinə görə, yenidənqurma çərçivəsində 23 kilometrlik sahədə artıq işlər başa çatıb. "Əsas məqsəd 2014-cü ilin sonunadək qatarların hərəkət sürətini saatda 140 kilometrə çatdırmaqdır", - o deyib.
Yenidənqurma işlərinə "Azərbaycan Dəmir Yolları" QSC yanında "Dəmiryolservis" MMC-nin 4 və 11 nömrəli ixtisaslaşdırılmış dəmiryol idarələri və infrastruktur departamentinin müvafiq strukturları cəlb edilib.