Azərbaycan, Bakı, 12 dekabr /Trend, müxbir N.İsmayılova/
"Azərpoçt" MMC "MasterCard Int." beynəlxalq kart təşkilatının prinsipal üzvlüyünə qəbul edilib. Trend-in məlumatına görə, bu barədə "Milli Kart" MMC-nin bazar ertəsi yaydığı məlumatda deyilir.
"Hazırda "Azərpoçt" MMC "MasterCard Int." beynəlxalq kart təşkilatında kartların emissiyası, həmçinin "ATM ekvayrinq"i üzrə sertifikasiya layihələrinə başlayıb", - məlumatda deyilir.
Məlumata görə, "Expressbank" ASC "MasterCard Int." beynəlxalq kart təşkilatında "MChip (çip) kartların emissiyası", həmçinin "MChip ATM ekvayrinq"i üzrə sertifikasiya layihələrinə başlayıb.
"MilliKart" MMC-də xidmət olunan "Dəmirbank" ASC "VISA Inc." beynəlxalq kart təşkilatında VISA Platinum və VISA Business kartları üzrə "VSDC (çip) kartların emissiya" olunmasına dair sertifikasiya layihəsini başlayıb.
Bu gün "Milli Kart" MMC-də 200-dən artıq bankomatın, 2000 Pos-terminalın və 170 000-dən artıq kartın buraxıldığı 12 banka xidmət göstərilir.
"Milli Kart" MMC 2006-cı il iyulun 14-də ölkənin 18 bankı tərəfindən Azərbaycan Mərkəzi Bankının kart ödənişləri üzrə prosessinq mərkəzinin alınmasından sonra yaradılıb. "MilliKart" MMC-nin nizamnamə kapitalı 5 milyon manat təşkil edir.
Mərkəzin təsisçiləri bunlardır: AtaBank, DəmirBank, AzərTürkBank, Bank of Baku, Azərbaycan Sənaye Bankı, DebutBank, AmrahBank, Xalq Bank, Credo Bank, AccessBank, ParaBank, RabitaBank, Bank Respublika, Bank Standard, Texnika Bank, Turan Bank, UniBank və Zamin Bank.