Azərbaycan, Bakı, 30 dekabr /Trend, müxbir A.Axundov/
Azərbaycanın Dövlət Sosial Müdafiə Fondu (DSMF) pensiyaçılar tərəfindən bankomatlardan pensiya kartları ilə nağd pulun çıxarılması üzrə komissiyanın ləğvi məsələsi ilə əlaqədar banklarla və Mərkəzi Bankla danışıqlar aparır. Trend-in məlumatına görə, bu barədə cümə günü jurnalistlərə DSMF sədri Səlim Müslümov deyib.
"Biz hazırda banklar vasitəsilə pensiyaların avtomatlaşdırılmış ödənişi məqsədilə yeni tenderin keçirilməsinə hazırlaşırıq. Artıq ilkin şərtlər hazırlanıb. Tender komissiyası tamamilə formalaşdırılıb. Tender yaxın günlərdə elan ediləcək", - Müslümov bildirib.
Onun sözlərinə görə, tender hər biri təxminəm 100 min nəfəri əhatə edəcək 12 lot üzrə keçiriləcək. Ölkədə indi təxminən 1,28 milyon pensiyaçı var.
"İlkin şərtlərdən biri odur ki, hər 1100 nəfərə heç olmasa bir bankomat düşməlidir. Həmçinin, banklar plastik kartları özləri hazırlamalı və pensiyaçılara təqdim etməlidirlər, DSMF şöbələri burada iştirak etməyəcək. Ən əsas şərt bankın göstərdiyi xidmətlərə görə təklif edəcəyi qiymətdir", - Müslümov deyib.
Onun sözlərinə görə, hazırda vacib məsələ bu tenderdə qalib gələcək baklar arasında interfeysin qurulmasıdır.
"Hazırda banklar arasında interfeys əlaqəsi qurulmayıb. İnterfeysin qurulması pensiyaçılara sərfəli olacaq, onlar hər hansı bank xidmətlərindən istifadə etdiklərinə görə komisyon haqqı ödəməyəcəklər, eləcə də bu, bankların xeyrinə işləyəcək. Belə ki, bununla da hər 1100 nəfərə heç olmasa bir bankomatın düşməsi şərtini yerinə yetirmək asandır", - Müslümov bildirib.
Müslümov əvvəl qeyd etmişdi ki, DSMF Azərbaycan Beynəlxalq Bankı (ABB) və "Kapital Bank"la pensiyaların alınması prosesinin təkmilləşdirilməsi məqsədilə yaxın vaxtlarda bütün ölkə üzrə əlavə 73 bankomatın quraşdırılması haqqında razılaşıb.
"Fondun 2012-ci il büdcəsinin müzakirəsi zamanı deputatların qaldırdığı əsas məsələlərdən biri pensiyaçılara pensiyanın daha rahat çatdırılması üçün əlavə bankomatların quraşdırılması məsələsi olub. Bu dövrdə biz ABB və "Kapital Bank"ın rəhbərliyi ilə görüşdük. Yaxın müddətdə bütün ölkə üzrə bizim tərəfdən seçilən yerlərdə əlavə olaraq ABB-nin 50 və "Kapital Bank"ın 23 bankomatının çatdırılması və quraşdırılması haqqında qərar qəbul edilib. Bundan başqa, ABB daha 50 bankomat və 4 səyyar bankomat sifariş verib. Bu bankomatlar ölkə üzrə gələn ilin ilk yarısından quraşdırılacaq", - Müslümov vurğulayıb.
Dekabrın 30-na olan rəsmi məzənnə 0,7869 AZN/USD təşkil edir.
