Azərbaycan, Bakı, 5 yanvar /Trend, müxbir A.Axundov/
2011-ci ilin yanvar-noyabr aylarında Azərbaycanın dövlət büdcəsinin gəlir hissəsinə faktiki daxilolmalar 2010-cu ilin analoji dövrü ilə müqayisədə 26,6 faiz artaraq 11638,9 milyon manat (ÜDM-in 25,6 faizi) təşkil edib. Bu barədə cümə axşamı Trend-ə ölkə hökumətindən məlumat veriblər.
35,2 faiz artan dövlət büdcəsinin xərcləri 11387,2 milyon manat (ÜDM-in 25 faizi) təşkil edib. Yanvar-noyabrda dövlət büdcəsinin profisiti 251,7 milyon manat səviyyəsində olub ki, bu da ÜDM-in 0,6 faizini təşkil edib.
Daxilolmalar strukturunda 44,1 faiz (5134,7 milyon manat) Vergilər Nazirliyi hesabına təmin edilib. Gömrük rüsum və vergilərindən daxilolmalar 1033,4 milyon manat (8,9 faiz xüsusi çəki nəzərə alınmaqla), digər mənbələr hesabına isə 5470,8 milyon manat (47 faiz) təşkil edib.
Hesabat dövründə əlavə dəyər vergisindən 1976,8 milyon manat daxil olub ki, bu da ümumi gəlirin 17 faizini təşkil edir. Mənfəət vergisi üzrə 2196,9 milyon manat (18,9 faiz), gəlir vergisi üzrə 626,7 milyon manat (5,4 faiz) aksiz vergisi üzrə 454,3 milyon manat (3,9 faiz), əmlak vergisi üzrə 98,2 milyon manat (0,8 faiz), torpaq vergisi üzrə 33,1 milyon manat (0,3 faiz), yeraltı sərvətlər vergisi üzrə 117,3 milyon manat (1 faiz), xarici iqtisadi fəaliyyət vergisi üzrə 344,9 milyon manat (3 faiz) daxil olub.
Yanvar-fevralda büdcə vəsaitlərindən sosial təminat və əhalinin müdafiəsinə 1370,9 milyon manat (12 faiz xüsusi çəki ilə), təhsilə 1061 milyon manat (9,3 faiz), səhiyyəyə 405,8 milyon manat (3,6 faiz), prokurorluq, təhlükəsizlik, hüquq-mühafizə orqanlarının, məhkəmə hakimiyyətlərinin saxlanmasına 570,6 milyon manat (5 faiz), iqtisadiyyata investisiya qoyuluşlarına 5006,2 milyon manat (44 faiz) xərclənib.
Ümumi kapital qoyuluşlarından mənzil-istismar xərclərinə 206,2 milyon manat (1,8 faiz), kənd, meşə təsərrüfatlarına, eləcə də balıqçılığa 370,8 milyon manat (3,3 faiz), sənaye, tikinti və faydalı qazıntıların kəşfiyyatına 4266,9 milyon manat (37,5 faiz), nəqliyyat və rabitəyə isə 51,3 milyon manat (0,5 faiz) ayrılıb.
Yanvarın 5-nə olan rəsmi məzənnə 0,7865 AZN/USD təşkil edir.