Azərbaycan, Bakı, 7 yanvar /Trend, müxbir İ.Xəlilova/
2011-ci ilin noyabrında Azərbaycan banklarının depozit bazası 2,1 faiz artıb, ilin əvvəlindən isə artım 16,6 faiz olub. Bu barədə Azərbaycan Mərkəzi Bankının (AMB) məlumatında deyilir.
Dekabrın əvvəlinə olan vəziyyətə görə, bank depozitlərinin, hüquqi və fiziki şəxslərin əmanətlərinin ümumi həcmi noyabrın əvvəlində olan 8707,8 milyon manata nisbətdə 8892,8 milyon manat təşkil edib. İlin əvvəlində isə bu göstərici 7625,8 milyon manat olub. Ümumi portfeldən 3888,6 milyon manat milli valyutada depozitlərin payına, 5004,2 milyon manat isə xarici valyutadakı depozitlərin payına düşüb.
Noyabr ayı ərzində fiziki şəxslərin əmanətləri 4,2 faiz artıb, hüquqi şəxslərin depozitlərinin həcmi isə 4 faiz azalıb. İlin əvvəli ilə müqayisədə fərdi müştərilərin depozitləri 26,4 faiz, korporativ müştərilərin depozitləri isə 13 faiz artıb.
Dekabrın əvvəlinə fiziki şəxslərin ölkənin banklarındakı əmanətlərinin həcmi 3830,1 milyon manat təşkil edib. Bu göstərici noyabrın əvvəlinə 3675 milyon manat, 2011-ci il yanvarın 1-nə isə 3029,8 milyon manat olub.
Bu dövrdə hüquqi şəxslərin depozitlərinin həcmi 2459,7 milyon manat təşkil edib. Bu göstərici müvafiq olaraq 2563,4 milyon manat və 2177 milyon manat təşkil edib.
Dekabrın əvvəlinə qeyri-maliyyə təşkilatlarının depozitlərinin həcmi 2603 milyon manat təşkil edib. Bu göstərici müvafiq olaraq 2469,4 milyon manat və 2419 milyon manat təşkil edib.
Yanvarın 7-nə olan rəsmi məzənnə 0,7864 AZN/USD təşkil edir.
