Azərbaycan, Bakı, 10 yanvar /Trend, müxbir A.Axundov/
Azərbaycan Maliyyə Nazirliyi yanında Dövlət Sığorta Nəzarəti Xidməti ölkənin sığorta bazarının nizamlanması mexanizmini təkmilləşdirir. Bu barədə çərşənbə axşamı Trend-ə Dövlət Xidmətinin sektor müdiri Mahir Abdullayev deyib.
Onun sözlərinə görə, Dövlət Xidməti qüvvədə olan qanunvericilik aktlarına əlavə düzəlişlər hazırlayır.
"Biz mövcud qanunvericiliyin təkmilləşdirilməsi və yeni normativ aktların hazırlanması üzərində işləyirik. Hazırda qanunvericilik aktlarına əlavə düzəlişlər hazırlayırıq", - Abdullayev bildirib.
Abdullayev qeyd edib ki, bu düzəlişlər sığorta şirkətlərinin fəaliyyətinin daha dəqiq nizamlanmasına, sığortaçıların maraqlarının müdafiəsinin gücləndirilməsinə, qanunvericiliyin beynəlxalq təcrübəyə uyğunlaşdırılmasına yönəldiləcək.
Azərbaycanın sığorta bazarı 2008-ci ilin martından qüvvədə olan "Sığorta fəaliyyəti haqqında" qanunla tənzimlənir.
Azərbaycanda 29 sığorta və 1 təkrar sığorta şirkəti fəaliyyət göstərir. Bununla yanaşı, "Fidan Sığorta" şirkətinin fəaliyyət lisenziyası dayandırılıb.
11 ay ərzində ölkədə fəaliyyət göstərən bütün şirkətlərin mükafatlarının ümumi həcmi 193,11 milyon manat təşkil edib (il ərzində 38,11 faiz), hesabat dövründə ödənişlər 55,95 milyon manat olub (23,02 faiz artım).
Yanvarın 10-na olan rəsmi məzənnə 0,7863 AZN/USD təşkil edir.
