Azərbaycan, Bakı, 24 yanvar /Trend müxbir E.İsmayılov/
Azərbaycan Nəqliyyat Nazirliyi Bakıda Ziya Bünyadov prospektinin yenidən qurulması çərçivəsində fəal işləri davam etdirir. Bu barədə çərşənbə axşamı Trend-ə "Azəryolservis" SC-nin mətbuat xidmətinin rəhbəri Pünhan Mürsəlov bildirib.
Onun sözlərinə görə, Ziya Bünyadov prospektinin yenidən qurulması layihəsi çərçivəsində nəzərdə tutulan bütün yol qovşaqlarının tikintisi 2012-ci il ərzində başa çatacaq. Yolun özünün salınması və yenidən qurulması üzrə işlər hələlik başlamayıb.
"Layihənin tam həyata keçirilməsinin müddəti haqqında danışmaq hələlik çətindir, lakin yol qovşaqlarının tikintisi artıq bu il başa çata bilər" , - Mürsəlov qeyd edib.
Prospektdəki qovşaqlardan biri üç tunel və bir yol ötürücü, daha bir qovşaq bir yol ötürücüdən ibarət olacaq, qalan iki qovşaq isə tunel formasında olacaq.
Prospektdə ümumilikdə beş yol qovşağının tikintisi nəzərdə tutulur.